Kryetari i Bashkisë së Kukësit, Safet Gjici, ka thënë se qytetarët e kësaj ane janë të zhgënjyer me vendimin e Qeverisë së Kosovës për të mos i lejuar të futen në Kosovë pa pasur të marra të tri vaksinat anti-COVID apo dy vaksina dhe testin negativ.
“Për këtë edhe janë vetorganizuar dhe kanë protestuar sot pranë Doganës”, ka thënë Gjici në një bisedë në emisionin “60 Minuta” në KTV.
Gjici ka thënë se qytetarët e Kukësit, Hasit e Tropojës janë shumë të lidhur me Kosovën, sidomos Prizrenin.
“Mbi 70 për qind e biznesit, qytetarët e Kukësit e bëjnë me Prizrenin po jo vetëm. Ka pakënaqësi dhe shpresojmë në mirëkuptimin e Qeverisë së Kosovës”, tha ai.
Gjici ka thënë se shumë kuksianë janë të punësuar në Prizren dhe gjatë ditës lëvizin. Një problem tjetër për shtetasit në Shqipëri është se dozën e tretë të vaksinës nuk mund ta marrin pa u bërë 6 muaj nga doza e dytë. Në Kosovë lejohet marrja e vaksinës së tretë tre muaj pas të dytës.
Gjici ka folur edhe për një vendin të dy qeverive, që është marrë më 26 nëntor. Sipas tij, banorët deri në 30 km larg kufirit lejohen të kalojnë kufirin pa procedura.
“Nga ana e jonë kjo po zbatohet, por jo edhe nga Kosova”, tha Gjici.
Ai tha se shumë qytetarë të Kukësit, në Prizren vijnë edhe për shërbime mjekësore.
“Sidomos ata me dializë”, tha ai.