Mbreti Charles III ka mbërritur në Bermudë pasi ai dhe Mbretëresha Camilla përfunduan vizitën e tyre katërditore shtetërore në SHBA me një paradë komunitare në Virxhinia.
Ai bëri një hyrje të thjeshtë në Hamilton, kryeqytetin e territorit, ndërsa një pritje ceremoniale pritet të zhvillohet të premten. Mbreti, i cili nuk shoqërohej nga Mbretëresha, po bën vizitën e tij të parë në ishull si monark.
Çifti mbretëror e shënoi ditën e fundit në SHBA në një atmosferë më të relaksuar me muzikë bluegrass dhe country rock në qytetin e vogël Front Royal.
Kjo erdhi pas ditësh formalitetesh dhe sfidash diplomatike në Uashington DC.
Turma të mëdha i pritën Mbretin dhe Mbretëreshën me duartrokitje, në daljen e tyre të parë përballë publikut amerikan, pasi aktivitetet e mëparshme ishin zhvilluar nën masa të rrepta sigurie.
Edhe ky aktivitet kishte siguri të lartë, por dukej se një pjesë e madhe e banorëve të qytetit kishte dalë për t’i parë.
Çifti mbretëror ndoqi një bandë marshuese dhe, për herë të parë gjatë kësaj vizite, bëri një “walkabout” për të përshëndetur njerëzit, gjë që u pëlqeu vendasve që shijonin diellin e Appalachia-s.
Atmosfera ishte festive, me flamuj e dekorime, lojtarë të rinj bejsbolli dhe veteranë të moshuar. Cheerleader-at brohorisnin dhe një paradë makinash klasike kaloi nëpër qytet.
U shfaq edhe një demonstrim i vallëzimit tradicional Appalachian clog, i ndjekur me interes nga Mbreti dhe Mbretëresha, në një lloj shfaqjeje spontane.
Kjo ishte “block party” e Front Royal-it, një festë komunitare që shënonte 250-vjetorin e pavarësisë së SHBA-së.
U organizua edhe një vakt komunitar “pot luck” dhe, sipas traditës, Mbreti dhe Mbretëresha sollën kontributet e tyre – një quiche të kurorëzimit, një tortë Victoria sponge dhe mjaltë nga kosheret mbretërore.
Qyteti, me rreth 15,000 banorë, përfaqësonte tipiken e Amerikës së vogël, me dyqane me emra karakteristikë lokalë.
Vizita mbretërore mund të tejkalojë edhe një moment historik të mëparshëm kur Bing Crosby kishte kënduar aty në vitin 1948.
Ishte një ditë e madhe për qytetin, por edhe një lehtësim për çiftin mbretëror – një vizitë që pothuajse nuk ndodhi, pasi kryetari i bashkisë fillimisht e kishte fshirë emailin e ftesës duke menduar se ishte mashtrim.
Kjo ishte një përmbyllje e gëzueshme për një vizitë katërditore që rezultoi më e suksesshme se sa pritej, ku veçanërisht fjalimi i Mbretit në Kongres u prit me duartrokitje.
Para se të shkonin në Virxhinia, Mbreti dhe Mbretëresha i dhanë lamtumirën zyrtare në Shtëpinë e Bardhë Presidentit Donald Trump dhe Zonjës së Parë Melania Trump.
Më pas vendosën një kurorë me lule në Varrezat Kombëtare Arlington, te Varri i Ushtarit të Panjohur, ku u qëllua edhe një salvo nderi.
Hapat e fundit të kësaj vizite shtetërore u zhvilluan në Virxhinia dhe në luginën Shenandoah.
Në Front Royal nuk kishte atmosfera formale si në Uashington apo pritje luksoze si në Nju Jork, por muzikë, brohoritje dhe kontakt të drejtpërdrejtë me njerëzit.
Vizitorët mbretërorë dukeshin të kënaqur, ndërsa banorët shijonin momentin e tyre në vëmendje.
Më pas, me një autokolonë makinash zyrtare, ata u larguan drejt destinacionit të radhës – Bermudës.
Mbreti Charles mbërriti në aeroportin ndërkombëtar LF Wade në Hamilton, ku u prit nga Guvernatori britanik Andrew Murdoch, Kryeministri i Bermudës David Burt dhe zyrtarë të tjerë.
Një gardë nderi nga Regjimenti Mbretëror i Bermudës u rreshtua për ta pritur.
Të premten pritet një ceremoni zyrtare me protokoll dhe një përshëndetje me 21 të shtëna topi.
