Një 34-vjeçar është akuzuar për pesë raste të tentativës për vrasje pasi dyshohet se përplasi me makinë pesë këmbësorë në zonën e Ealing Broadway, në perëndim të Londrës.
Sipas Policisë Metropolitane, i dyshuari, Timir Ahmed Mohamed, përballet gjithashtu me akuza për drejtim të rrezikshëm të automjetit, largim nga vendi i aksidentit, refuzim për të dhënë mostër frymëmarrjeje për analizë dhe dëmtim të pronës.
Ngjarja ndodhi pranë një dyqani Marks & Spencer. Si pasojë e përplasjes, pesë persona mbetën të plagosur. Tre prej tyre u dërguan në spital, ndërsa dy morën ndihmë mjekësore në vendngjarje. Autoritetet kanë bërë të ditur se asnjëri prej të lënduarve nuk ka plagë që rrezikojnë jetën ose që pritet të kenë pasoja të përhershme.
Policia njoftoi se shoferi u largua nga vendi i ngjarjes, por u arrestua pak më vonë në zonën e Grange Park. Edhe pse hetimet fillestare u mbështetën nga njësia kundër terrorizmit, autoritetet kanë sqaruar se incidenti nuk po trajtohet si akt terrorist. Motivi mbetet nën hetim.
