Dy djem, të moshës 8 dhe 10 vjeç, humbën jetën në një ngjarje tragjike në bazën ushtarake britanike të Dhekelias në Qipro, ndërsa babai dhe njerka e tyre janë arrestuar nën dyshimin për neglizhencë.
Sipas autoriteteve, policia e bazës britanike dhe ekipet e emergjencës ndërhynë në vendngjarje pasi fëmijët u gjetën pa shenja jete. Mjekët raportuan se viktimat, me origjinë bullgare, kishin shenja të ekspozimit ekstrem ndaj temperaturave të larta, përfshirë djegie nga dielli dhe ngurtësim të muskujve.
Sipas raportimeve paraprake, dyshohet se fëmijët mund të kenë mbetur për një kohë të gjatë brenda një automjeti të parkuar, megjithatë autoritetet nuk kanë konfirmuar ende zyrtarisht rrethanat e sakta të ngjarjes.
Policia ka arrestuar babanë dhe njerkën e fëmijëve si pjesë e hetimeve për neglizhencë të dyshuar që lidhet me vdekjen e tyre. Ata mbeten në paraburgim, ndërsa hetimet vazhdojnë për të zbardhur plotësisht ngjarjen.
Autoritetet pritet të kryejnë autopsitë dhe ekzaminimet përkatëse për të përcaktuar shkakun zyrtar të vdekjes. Deri në përfundimin e hetimeve, të arrestuarit konsiderohen të pafajshëm në përputhje me parimin e prezumimit të pafajësisë.
