Shpërthime tronditën Damaskun të martën, ndërsa Presidenti i Francës, Emmanuel Macron, u takua me homologun e tij sirian, Presidentin Ahmad al-Sharaa, në atë që konsiderohet vizitë historike. Raportohet se shpërthimet u regjistruan pranë hotelit ku do të qëndrojë Macron.Presidenti francez sapo kishte hyrë në Pallatin Presidencial për t’u takuar me al-Sharaa kur ndodhën shpërthimet pranë hotelit “Four Seasons”. Autoritetet siriane nuk komentuan menjëherë për incidentin.
Duke cituar një zyrtar të sigurisë të paidentifikuar, media shtetërore raportoi se dy shpërthimet në zemër të kryeqytetit u shkaktuan nga pajisje shpërthyese. Një re e madhe tymi mund të shihej nga vendi i ngjarjes. Pamjet e qarkulluara gjerësisht në mediat sociale tregonin një automjet në flakë dhe njolla gjaku në rrugë.
Ende nuk dihet zyrtarisht numri i viktimave. Po ashtu asnjë grup nuk e ka marrë përsipër autorësinë e sulmit. Incidenti vjen disa ditë pasi një pajisje shpërthyese shpërtheu në një kafene pranë Pallatit të Drejtësisë në Damask, duke vrarë të paktën 10 persona dhe duke plagosur 20 të tjerë.
