Një person i armatosur është vrarë nga agjentët e Secret Service pas një shkëmbimi zjarri pranë White House në Uashington.
Sipas autoriteteve amerikane, i dyshuari iu afrua një pike kontrolli sigurie pranë Shtëpisë së Bardhë dhe hapi zjarr ndaj oficerëve, të cilët iu kundërpërgjigjën me armë. Pas incidentit, ai u dërgua në spital, ku më vonë u shpall i vdekur.
Ngjarja ndodhi mbrëmjen e së shtunës dhe shkaktoi izolimin e përkohshëm të zonës përreth kompleksit presidencial. Gazetarë që ndodheshin aty pranë raportuan se dëgjuan një seri të gjatë të shtënash, ndërsa forcat e sigurisë urdhëruan strehimin e menjëhershëm të personelit dhe mediave.
Autoritetet konfirmuan se presidenti amerikan ndodhej në Shtëpinë e Bardhë në momentin e incidentit, por nuk u lëndua. Një kalimtar raportohet gjithashtu i plagosur gjatë shkëmbimit të zjarrit.
FBI dhe Secret Service kanë nisur hetimet për motivin e sulmit, ndërsa kjo është ngjarja më e fundit në një seri incidentesh sigurie pranë institucioneve federale amerikane gjatë muajve të fundit.
