Bashkimi Europian nuk mund të vazhdojë negociatat e pranimit me Serbinë, nëse ky shtet nuk respekton sanksionet kundër Rusisë.
Ky është kushti i kërkuar nga socialdemokratët, grupi I dytë më i madh në Parlamentin Europian, si kundërpërgjigje e Brukselit ndaj Beogradit, për të dënuar ujdinë e fundit me Moskën.
Por duket se as ky presion nuk po pengon afrimin e mëtejshëm të Serbisë me Rusinë, dy vende që u pajtuan në Nju Jork që të shtonin takimet konsultuese dhe bashkëpunimin në politikën e jashtme.
Presidenti, Aleksandër Vucic, në emër të Serbisë ka përgatitur një përgjigje të prerë dhe të ashpër ndaj administratës së Brukselit. Këtë e raporton “Novosti” që saktëson se përgjigja do të bëhet e ditur brenda 72 orëve.
Reagimi i tij do të përqendrohet kryesisht kundër qëndrimit të BE-së, të njoftuar nga zëdhënësi Peter Stano, me të cilin vihej në dyshim aspirata e Serbisë për t’ju bashkuar bllokut. Në fjalën e tij, Vucic pritet që të vazhdojë retorikën kundër Kosovës dhe krahasimin e asaj që po ndodh mes Ukrainës dhe Rusisë, me situatën mes Serbisë dhe Kosovës.
