Kryetarja e Lëvizjes Socialiste për Integrim, Monika Kryemadhi, ka zhvlluar këtë të shtunë, takim me të rinjtë në qytetin e Fierit, ku ka theksuar se Fieri ka nevojë për personalitetet e veta dhe për kuadro të rinj.
Sipas Kryemadhit, Kryeministri po e shtyn rininë drejt emigracionit.
“Ajo që ne mendojmë dhe që është shumë e rëndësishme është që sot Fieri ka nevojë për kuadrot e tij, Fieri ka nevojë për personalitetet e veta, të cilat do t’i duhen jo vetëm për politikën, por dhe për ekonominë, industrinë, bujqësinë dhe për shumë fusha të tjera të jetës, të cilat e bëjnë të mundshme jetesën në këtë vend”, tha kryetarja e LSI.
“Ne sot këtu kemi Olën që ka mbaruar studimet jashtë shtetit dhe sot e kemi këtu. Është kthyer në Shqipëri sepse mendon se mund të kontribuojë në këtë vend. Ndërkohë janë edhe shumë të rinj dhe të reja të tjerë këtu. Pra, janë një grup të rinjsh dhe të rejash të cilët kanë kontribuar, kanë mbaruar studimet, kanë mbaruar shkollat dhe në fund të ditës çfarë iu ofron sot politika shqiptare”,- shtoi ajo.
“Ajo që mua më bën më shumë përshtypje, por që revolta ime ndaj një individi të tillë nuk është më revoltë por është neveri, ndaj një Kryeministri që thotë: ‘Të rinjtë dhe të rejat rrinë në kafe, se punë ka! Prandaj do të marrim të tjerë nga jashtë!’”,-vijoi Kryemadhi.
“Të gjithë të rinjtë dhe të rejat po ikin në Gjermani për të punuar jashtë profesionit të tyre, ku familjet e tyre kanë harxhuar para për t’i diplomuar, për të përfunduar shkollën dhe të shkosh të punosh kamerier. Nuk është turp të punosh, por kur je inxhinier nafte dhe të shkosh të punosh po themi kamerier, kur je ekonomist dhe të shkosh të punosh recepsionist, kur je inxhinier kimist dhe të shkosh të punosh ndihmës/kuzhinier, nuk mund të thuash që ka vende pune. Sepse nuk mund të thuash që janë vendet e punës, por këto njerëz janë dembelë”,- theksoi kryetarja e LSI.
“Pra, ne kemi një Kryeministër që e shtyn rininë tonë që të shkojë në emigracion. Pra është një Kryeministër që e stimulon shpopullimin e vendit. Është një kryeministër që në fakt largon të rinjtë dhe të rejat nga Shqipëria dhe sjell njerëz që nuk kanë asnjë lloj lidhjeje, qoftë kjo emocionale, qoftë kjo historike apo edhe kulturore me vendin tonë”, tha ajo.
“Ndoshta mund të quhet pak nacionaliste, por nuk do ta quaja absolutisht të tillë. Unë nuk mendoj që ka njeri nga ne që lejon dikë të hyjë në shtëpi. Njerëzit prandaj i kanë vendosur derë shtëpisë, që secili nga ne të menaxhojë familjen e tij dhe shtëpinë e tij.
Dhe Shqipëria nuk mund të jetë han pa porta që mund të hyjnë, të dalin dhe të bëjnë çfarë të duan. Kur Shqipëria është një vend që duam apo nuk duam, në të mirë dhe në të keq, është një vend për të cilin kemi luftuar të gjithë, kemi kontribuar të gjithë kush më shumë e kush më pak dhe nuk mund të lejojmë ne që të rinjtë tanë të largohen nga Shqipëria”,- theksoi Kryemadhi.
