Zëvendësministri i Brendshëm, Andi Mahila priti në takim përfaqësues nga Qendra Ndërkombëtare e Përsosmërisë për Luftën kundër Ekstremizmit të Dhunshëm (Hedayah), ku të pranishëm ishin kryetari i Qendrës, Ali Rasheed Al Nuaimi, drejtori ekzekutiv Ahmed Alqasimi dhe Abeer Makki, menaxhere e Çështjeve Ekzekutive.
Fokusi kryesor i takimit ishte rritja e bashkëpunimit të mëtejshëm midis Ministrisë së Brendshme dhe kësaj Qendre në fushën e sigurisë dhe luftës kundër ekstremizmit të dhunshëm.
Zv.ministri duke vlerësuar marrëdhëniet miqësore dhe shumë të mira midis dy vendeve tona, shprehu rëndësinë e bashkëpunimit në çështjet e sigurisë, ku theksoi se takimet e vazhdueshme dhe dialogu i shpeshtë janë instrumente efektivë në luftën kundër ekstremizmit të dhunshëm, të cilat ndikojnë gjithashtu në mirëkuptimin për çështje të ndryshme.
Mahila nënvizoi rëndësinë që ka parandalimi i ekstremizmit të dhunshëm si një investim jetik për paqen dhe sigurinë, duke sqaruar që legjislacioni shqiptar dhe politikat aktive të qeverisë shqiptare kanë ndihmuar dhe do të ndihmojnë në aspektin parandaluese të luftës kundër radikalizimit dhe ekstremizmit të dhunshëm. Ai shtoi gjithashtu se puna në Shqipëri për të parandaluar shkaqet e terrorizmit është përqëndruar në luftimin e ekstremizmit të dhunshëm, në parandalimin e rekrutimit dhe radikalizmit që çon në terrorizëm.
Kryetari i Qendrës Hedayah, Ali Rasheed Al Nuaimi prezantoi fushën e veprimtarisë së Qendrës, e cila në fokus kryesor ka asistencën në luftën kundër ekstremizmit të dhunshëm, duke ofruar ekspertizën e kësaj Qendre në këtë fushë. Ai vlerësoi rolin e rëndësishëm dhe angazhimin e Shqipërisë për stabilitetin në rajon dhe për këtë arsye e ka filluar vizitën e tij pikërisht me Shqipërinë.
