Charles III dhe Camilla pritet të mbërrijnë në Shtetet e Bashkuara për një vizitë shtetërore, gjatë së cilës Mbreti do të bëhet monarku i dytë britanik që mban një fjalim në Kongresin amerikan.
Vizita vjen në një moment delikat, vetëm pak ditë pas një incidenti me të shtëna gjatë një darke gala ku morën pjesë presidenti Donald Trump dhe anëtarë të administratës së tij. Pavarësisht shqetësimeve për sigurinë, Buckingham Palace ka konfirmuar se itinerari do të mbetet kryesisht i pandryshuar, ndërsa Trump ka garantuar se monarku do të jetë “shumë i sigurt”.
Kjo vizitë zhvillohet gjithashtu në sfondin e marrëdhënieve të tensionuara mes SHBA-së dhe Mbretërisë së Bashkuar për shkak të luftës në Iran. Megjithatë, Trump ka deklaruar se vizita mund të ndihmojë “absolutisht” në përmirësimin e marrëdhënieve mes dy vendeve.
Çifti mbretëror do të qëndrojë në SHBA deri më 30 prill, duke marrë pjesë në një sërë aktivitetesh zyrtare në Uashington, përfshirë një ceremoni në Shtëpinë e Bardhë, një festë në kopsht dhe një takim privat me presidentin dhe bashkëshorten e tij, Melania Trump.
Një nga momentet kryesore të vizitës do të jetë fjalimi i Mbretit në Kongres, duke ndjekur traditën e nënës së tij, Elizabeth II. Më pas, ai dhe Camilla do të udhëtojnë drejt New York, ku do të marrin pjesë në një ceremoni përkujtimore të 11 shtatorit dhe do të vizitojnë një projekt komunitar në Harlem.
Axhenda përfshin gjithashtu një ndalesë në Virginia për një aktivitet që shënon 250-vjetorin e pavarësisë amerikane. Pas përfundimit të vizitës në SHBA, Mbreti do të vijojë turin e tij me një ndalesë në Bermuda, përpara se të kthehet në Mbretërinë e Bashkuar.
