Ky seminar i cili është një nga ngjarjet më të rëndësishme vjetore në fushën e albanologjisë, ka për qëllim të ngritë nivelin e studimit në fushën e gjuhës, letërsisë dhe kulturës shqiptare
Me qindra pjesëmarrës, ka filluar Seminari i 39-të Ndërkombëtar për Gjuhën, Letërsinë dhe Kulturën Shqiptare në bibliotekën universitare të Universitetit të Prishtinës (UP), raporton Anadolu Agency (AA).
Ky seminar i cili është një nga ngjarjet më të rëndësishme vjetore në fushën e albanologjisë, ka për qëllim të ngritë nivelin e studimit në fushën e gjuhës, letërsisë dhe kulturës shqiptare.
Kryeministri i Kosovës, Albin Kurti, i cili ka marrë pjesë në hapje, tha se tri kanë dalë të jenë detyrat e përhershme të këtij seminari që nga fillimi i mbajtjes së tij: Prodhimi i multidisiplinitetit; relacioni i hollë i metodës me përmbajtjen; cilësia e shqipes dhe formësimeve të saj letrare dhe kulturore.
“Nëse mendoni dhe ndiqni tezën themelore se albanologjia është shkenca që drejton dijen shqiptare, ajo duhet të bëhet shkenca që motivon fakultetet me një pjesë të trupës së tyre. Natyrisht që shtysa për një albanologji vjen nga fakti se gjuha shqipe mendohet që të ketë disa specifika: lashtësinë dhe morfologjinë e saj”, tha Kurti.
Rektori i Universitetit të Prishtinës, Naser Sahiti, tha se seminari paraqet një nga forumet më të rëndësishme për të diskutuar dhe promovuar aspekte të veçanta që karakterizojnë gjuhën, letërsinë dhe kulturën shqiptare.
Ai tha se seminari ka ndihmuar në ndërkombëtarizimin e përpjekjeve të Kosovës për liri, demokraci dhe zhvillim të kombit.
“Që nga themelimi i tij, ky aktivitet kulturor dhe gjuhësor njihet për faktin që jo vetëm se e ka mbajtur gjallë interesin e të huajve për përvetësimin e gjuhës dhe kulturës tonë, por edhe për faktin që në periudhat më të rënda ka arritur të mbledhë rreth vetes albanologë nga Evropa dhe bota dhe në këtë mënyrë përveç ruajtjes, kultivimit dhe zhvillimit të albanologjisë, ka qenë gjithashtu i frytshëm në dhënien e kontributit të veçantë për ndërkombëtarizimin e përpjekjeve tona për liri, demokratizim dhe zhvillim të kombit tonë”, tha Sahiti.
Zëvendësministrja e Arsimit, Shkencës dhe Teknologjisë dhe Inovacionit, Edona Maloku, tha se ky seminar ka traditë të gjatë ndërsa çdoherë mbledhë studiues e studentë që me devotshmëri trajtojnë e promovojnë çështje të gjuhës, letërsisë e kulturës shqiptare.
Maloku tha këtë vit bie në sy gërshetimi i bukur i traditës së seminarit me temat që prekin të rejat aktuale si lajmet e rreme dhe infodemia që janë bërë më relevante se kurrë në kohë pandemie.
Këtë vit seminari do të mbahet nga data 23 gusht deri më 3 shtator 2021 dhe pjesë e tij do të jenë studiues të ndryshëm shqiptarë.
Seminari organizohet nga Fakulteti i Filologjisë i UP-së në bashkëpunim me Fakultetin e Historisë të Universitet të Tiranës. Ai organizohet që nga viti 1974. Qëllimi primar i organizimit të tij fillimisht ishte ofrimi i ndihmës për studentët dhe studiuesit e huaj që interesohen për gjuhën, letërsinë e kulturën shqiptare si dhe për shkencat albanologjike.
