Pas kancelares Angela Merkel, Presidentja e Komisionit Evropian Ursula von der Leyen do të vizitojë Shqipërinë në 28 shtator.
Lajmin e ka bërë me dije ambasadori Soreca në rrjetin social twitter ku shkruan se mezi pret që ta mirëpresë në Tiranë.
Gjatë fjalimit në Parlamentin Evropian presidentja e Komisionit Evropian von der Leyen tha se Evropës i duhet një shpirt, një ideal dhe vullnet politik për t’i shërbyer këtij ideali. Evropa i ka vënë në jetë këto fjalë në dymbëdhjetë muajt e fundit.
“Është një Bashkim ku ne forcojmë lirinë tonë individuale përmes forcës së komunitetit tonë. Një Bashkim i formuar po aq nga historia dhe vlerat tona të përbashkëta sa nga kulturat dhe perspektivat tona të ndryshme. Një bashkim me një shpirt.”
Presidentja e KE-së tha se BE-ja dhe Ballkani Perëndimor do të jenë gjithmonë më të fortë së bashku.
“Para fundit të muajit, do të udhëtoj në rajon për të dërguar një sinjal të fortë të angazhimit tonë për procesin e pranimit. Ua kemi borxh të gjithë atyre të rinjve që besojnë në një të ardhme evropiane.Kjo është arsyeja pse po rrisim mbështetjen tonë përmes planit të ri ekonomik dhe të investimeve, me vlerë rreth një të tretën e PBB-së së rajonit. Sepse një investim në të ardhmen e Ballkanit Perëndimor është një investim në të ardhmen e BE-së.”
Më herët politikania gjermane njoftoi gjithashtu se BE do të dhurojë edhe 200 milionë doza të tjera vaksine deri në mesin e vitit 2022. Kjo do të dyfishojë premtimet e BE për donacion në një shumë të përgjithshme prej 450 milionë doza vaksinash. Von der Leyen foli për një “investim në solidaritet dhe një investim në shëndetin global”.
Ajo e quajti luftën kundër pandemisë Corona “një nga çështjet më të mëdha gjeopolitike të kohës sonë”. Von der Leyen theksoi se deri tani “në të gjithë botën janë injektuar më pak se një përqind e vaksinave në vendet me të ardhura të ulëta”. Presidentja e Komisionit vuri në dukje gjithashtu se BE po investon një miliardë euro për të nxitur prodhimin e vaksinave në Afrikë.
Për të siguruar që një virus të mos bëhet pandemi në të ardhmen, von der Leyen propozoi investimin e 50 miliardë eurove në kujdesin shëndetësor në të gjithë BE, gjatë gjashtë viteve të ardhshme.
