Ministrja Xhaçka theksoi se përfshirja shumë aktive e ministres Morton në Ballkanin Perëndimor dhe Shqipëri “është treguesi më i qartë se këtu bëhet fjalë për një vullnet reciprok”
Ministrja për Evropën dhe Punët e Jashtme e Shqipërisë, Olta Xhaçka, ka realizuar një takim me ministren britanike për Evropën, Wendy Morton, duke diskutuar për marrëdhëniet mes dy vendeve dhe çështje të tjera, transmeton Anadolu Agency (AA).
Në një deklaratë të përbashkët pas takimit në Tiranë, Xhaçka tha se beson se kjo vizitë shënon hapjen e siparit të një faze të re në marrëdhëniet dypalëshe dhe bashkëpunimin mes Shqipërisë dhe Mbretërisë së Bashkuar.
Ajo theksoi ndër të tjera se përfshirja shumë aktive e ministres Morton në Ballkanin Perëndimor dhe Shqipëri “është treguesi më i qartë se këtu bëhet fjalë për një vullnet reciprok”.
“Ne kemi tashmë një Marrëveshje të Partneritetit, Tregtisë dhe Bashkëpunimit mes vendeve tona. Vitin që vjen do të ngrihet Këshilli i Partneritetit dhe Bashkëpunimit Tregtar, që do të jetë forumi përmes të cilit do të kalojë ky ridimensionim i marrëdhënieve tona”, është shprehur Xhaçka.
Morton ka theksuar se Britania konfirmon angazhimin për një marrëdhënie më të ngushtë me Shqipërinë dhe për të luajtur një rol pozitiv të vazhdueshëm në Ballkanin Perëndimor.
“Partneriteti ynë konfirmon po ashtu edhe angazhimin tonë për një marrëdhënie më të ngushtë me Shqipërinë, meqenëse ne po vazhdojmë të luajmë një rol të mëtejshëm dhe pozitiv në Ballkanin Perëndimor. Mbretëria e Bashkuar vazhdon të mbetet një vend mik dhe aleate e fortë për Shqipërinë dhe për Ballkanin Perëndimor”, ka theksuar Morton.
