Një ditë pas protestës, ish-Kryetari i Partisë Demokratike dhe Komisioni i Rithemelimit u rikthyen në selinë e shkatërruar të PD-së.
Sali Berisha tha se lista e të arrestuarve ka dalë nga Luzlim Basha dhe se protestuesit e ndaluar nuk u përfshinë në akte dhune.
“Ka ndenjur mbrëmë deri në mëngjes duke bërë listat e demokratëve që kërkonte të arrestoheshin, akt kolaboracionizmi i turpshëm dhe kriminal. Sikundër ka fheshur vrasësit dhe kriminelët,” tha Berisha.
Ish-Kryetari tha se ishte Lulzim Basha ai që provokoi i pari të shtunën duke hedhur gaz lotsjellës ndaj protestuesve.
“Nuk e hodhi policia gazin e parë, gazi i parë u hodh nga Lul Basha na ne,” tha Berisha.
Pasardhësin e cilësoi një armik të egër të demokratëve dhe bashkëpunëtor të Kryeministrit Rama.
“Nuk ka më qytetar shqiptar që nuk e ka të qartë se Lulzim Basha në mënyrë përfundimtare është murrosur në muret e kryeministrisë derisa ta çlirojmë edhe atë nga Edi Rama,” shtoi Berisha.
U shpreh i vendosur se protestat do të vijojnë por nuk dha një datë se kur demokratët do të mblidhen sërish për të larguar kryetarin aktual, Lulzim Bashën.
“Protesta e radhës i siguroj demokratët se do mbahet, por gjithçka do të jetë në funksion të interesit të tyre,” shtoi Berisha.
Gjatë fjalës së Berishës në shkallët e selisë së Partisë Demokratike, Lulzim Basha ishte në zyrën e tij ndërsa më herët gjatë paradites aty mbërritën edhe Sekretari i Përgjithshëm Gazmend Bardhi dhe nënkryetarët./Ora News/
