Presidenti i Kosovës, Hashim Thaçi ka deklaruar sot se shpërndarja e sotme e Parlamentit të Kosovës përshpejton hapat e organizmit të zgjedhjeve të parakohshme parlamentare, pas dorëheqjes së kryeministrit dhe në mungesë të gatishmërisë së partive politike parlamentare për të krijuar një qeveri të re.
Tani është në interes të qytetarëve të Kosovës që pas një procesi zgjedhor demokratik të kemi sa më shpejt një qeveri funksionale dhe llogaridhënëse, e cila i përballon sfidat që na presin si shtet dhe shoqëri, thuhet në deklaratë.
“Brenda kompetencave të mia kushtetuese, ligjore dhe në përputhje të plotë me vendimin e sotëm të Kuvendit, së shpejti do të marr vendim për dekretimin e zgjedhjeve të parakohshme parlamentare në Republikën e Kosovës”, ka thënë presidenti Thaçi.
Ai ka kërkuar që zgjedhjet e parakohshme duhet të jenë mirë të organizuara, profesionale, për të siguruar një proces fer, demokratik, që mundëson një monitorim të plotë të organizatave ndërkombëtare dhe atyre vendore.
Pavarësisht shpërndarjes së Parlamentit, presidenti Thaçi thotë se Republika e Kosovës vazhdon t’i ketë institucionet funksionale dhe te qëndrueshme, duke garantuar vazhdimin e punës së institucioneve në përmbushjen e nevojave të qytetarëve të Kosovës.
