Një prift grek 37 vjeç u arrestua ditën e djeshme pasi akuzohet se ka përdhunuar dhe keqtrajtuar seksualisht një vajzë të mitur.
Ka qenë denoncimi i 17-vjeçares, ai që e ka vendosur pas prangave priftin pedofil, e cila u ka thënë hetuesve se makthi i saj ka nisur që në moshën 13-vjeçare dhe ka zgjatur për gati 4 vite, deri në momentin që gjeti forcën të flasë për ngjarjen tragjike.
Autori i ngjarjes është prift dhe shërben në një kishë në lagjen Kato Patisia të Athinës, zonë në të cilën banon edhe familja shqiptare.
Ai vetë është prind i tre fëmijëve. 37-vjeçari ka mohuar akuzat, por autoritet thonë se tashmë e kanë konfirmuar autorësinë e tij në përdhunimin e të miturës, ndërkohë që në kompjuterin e tij janë gjetur materiale pornografike.
Ditën e sotme janë zbuluar detaje të tjera tronditëse.
Në 17 faqet e dëshmisë që e mitura ka dhënë më 9 nëntor 2021, në prani të një psikologeje, ka rrëfyer makthin që ka përjetuar. E mitura ka përshkruar me detaje aktet e tmerrshme nga prifti 37 vjeçar i kishës së Kato Patisias, i martuar dhe baba i tre fëmijëve.
“Kur fillova të shkoja në shkollën e mesme, nuk mora pjesë më në katekizëm. I thashë mamit që nuk doja të shkoja më dhe ishte periudha kur filloi pandemia dhe isha e vetme në shtëpi.
Qaja çdo ditë nga frika, nuk dija çfarë të bëja. Ky njëri më përdhunoi jo vetëm trupin por edhe shpirtin.”
Sipas dëshmisë së vajzës, gjithçka ka ndodhur brenda kishës, teksa ajo merrte pjesë në shkollën e Katekizmit. Ai më mbylli në kishë dhe filloi të më prekte në të gjithë trupin. Dhe pas kësaj ka marrë gruan në telefon sikur asgjë të mos kishte ndodhur duke i thënë se po kërkonte ti blinte një lodër djalit prandaj ishte vonuar, raporton abcnews.al
Vajza mes lotësh tregon se prifti e kishte kërcënuar se do ta vriste nëse do të fliste.
“Mendova se isha vetëm në këtë situatë dhe se asgjë nuk do të ndryshonte.” Por kur fola me shoqen time të ngushtë, kuptova se pranë vetes kisha edhe njerëz që mund të më ndihmonin.”
Menjëherë pas kësaj, 17 vjeçarja mblodhi forcat për të treguar historinë e saj fillimisht shoqes së saj, më pas nënës së shoqes së ngushtë dhë në fund raportoi në polici. Një tjetër nga detajet tronditëse që vajza i ka rrëfyer autoriteteve ishte fakti që prifti i ka dërguar gjithashtu foto nudo duke i kërkuar të miturës të bënte të njejtën gjë.
Prifti 37-vjeçar është arrestuar dhe gjykata dha masën e sigurisë “arrest me burg” për të. Ngjarja ka shkaktuar një skandal të madh në Greqi, por deri më tani nuk ka një reagim nga Kisha Ortodokse Greke për këtë ngjarje.