Rama vazhdon terrorin nga Dubai mbi shqiptarët

Ndërsa për vete ndodhet në Dubai, ku ka shkuar të shijojë diellin e ngrohtë të shkretërirës, Edi Rama ka vendosur që të vazhdojë terrorin mbi shqiptarët.
Meqë nuk ka marrë asnjë masë për të mbajtur nën kontroll çmimet që po çmenden çdo ditë, Rama ka vendosur të hedhë një kockë për ushqim të brendshëm, duke pretenduar se qeveria e tij ‘me zor’, po mban nën kontroll çmimin e energjisë elektrike.
E për të justifikuar këtë gjë, sot ka vendosur të na tregojë se Shqipëria edhe pse e prodhon energjinë nga uji, nuk e prodhon të gjithën pasi varet nga shiu dhe dëbora.
Pas këtij justifikimi Rama, shkruan se pritet që çmimi i energjisë elektrike të shkojë në 1 mijë euro për megavat orë, ndërsa tani është tek 550 euro megavat orë.
Ja çfarë shkruan Edi Rama në Facebook:
Shqipëria nuk e prodhon ende dot të gjithë sasinë e energjisë që i nevojitet.
Prodhimi ynë varet nga reshjet e shiut e të borës, të cilat për vitin e tretë rresht janë shumë më të ulëta se sa deri tri vite më parë!
Thatësira çon deri në pikën që thuajse gjysma e nevojave për energji të mbulohet nga importi, ndërkohë që prej disa muajsh bota ka hyrë në një krizë energjetike. Tanimë edhe për shkak të luftës në Ukrainë, çmimi për megavat vazhdon të rritet çmendurisht, orë e çast, nga 52 euro vjet në 550 euro aktualisht!
Gjasat janë që rritja marramendëse të vazhdojë dhe parashikimet shkojnë deri në çmendurinë totale të 1000 eurove për megavat orë!
Qysh me shfaqjen e shenjave të krizës energjetike disa muaj më parë, qeveria ka paralajmëruar kohë të vështira përpara dhe ka vendosur një mburojë financiare për familjet dhe biznesin e vogël.
Sot Shqipëria është ndoshta i vetmi vend që nuk e ka rritur asnjë qindarkë faturën e energjisë; aktualisht çmimi i importit për kilovat ka shkuar 61 lek, ndërkohë që familjarët vijojnë ta paguajnë kilovatin njësoj si përherë, 9.5 lek!
Të gjithë këtë diferencë të frikshme ekonomikisht e mbulon krejtësisht shteti, përtej 45 milionë USD që shkojnë çdo vit nga buxheti i shtetit për kompensimin e 2.5 lekëve për kilovat për çdo familje në nevojë.
Kostoja tejet e lartë e kësaj mburoje unikale rritet përditë dhe ne do të vazhdojmë ta financojmë sa të mundemi.
POR të gjithë duhet të vetëdijësohen se tanimë tregu i energjisë është pengu më i madh i luftës, e cila nuk sjell kurrë të mira, po vetëm dhimbje.
Këtë luftë nuk e ka zgjedhur Shqipëria dhe ne shqiptarët as nuk e ndalim dot, as nuk shmangim dot. Duhet vetëm ta përballojmë me kurajo, besim dhe durim. Të bashkuar, jo të ndarë.