Disa dhjetëra protestues që kishin mbetur para godinës së Kryeministrisë në Bulevardin “Dëshmorët e Kombit” janë larguar nga rruga prej efektivëve të Policisë së Shtetit.
Edhe pse gjatë paradites numri i protestuesve ishte shumë herë më i madh, dhe një nga skenarët e tyre ishte edhe qëndrimi për 24 orë para Kryeministrisë, në orët e pasdites dhe të mbrëmjes, kishin mbetur fare pak persona, të cilët policia arriti t’i largonte pa incidente madhore, për të liruar kështu bulevardin dhe qarkullimin e mjeteve në rrugë.
Megjithatë, një numër i vogël protestuesish vijojnë të qëndrojnë në trotuarin përballë Kryeministrisë dhe mbetet për t’u parë nëse do të largohen, apo do të mbesin aty për 24 orë, siç edhe paralajmëruan.
Gjatë paradites, mijëra vetë u mblodhën fillimisht në sheshin “Skënderbej”, ndërsa më pas marshuan drejt kryeministrisë me pankarta në duar. Me pankarta në duar dhe me fjalime përpara zyrës së kryeministrit, protestuesit kanë shprehur shqetësimin e tyre për abuzimet që janë bërë javët e fundit me çmimet dhe ndërhyrjen që ka bërë qeveria për t’i frenuar ato.
Ndërkohë që njerëzit protestonin para zyrës së tij, Kryeministri Rama ishte në Durrës, ku u shpreh se qeveria po bën asnjë shtet tjetër sa i përket çmimit të energjisë. “Ne po bëjmë atë që asnjë vend se ka bërë akoma. Pash që Franca ka bërë një kompensim, por jo të plotë. Ne po bëjmë kompensimin e plotë të faturës së energjisë. Ne sot jemi në mars dhe të gjitha problemet i kemi përpara. Kjo do të thotë se do të shkundim të gjithë buxhetin e shtetit që të mos vijë te ju. Jam dakord që janë rritur kostot, por kjo ka ardhur si pasojë e krizës së përgjithshme”, tha Rama.
