Mbretëria e Bashkuar do të ngrijë rreth 10 miliardë paund asete të mbajtura nga dy bashkëpunëtorë të Roman Abramovich-it, oligarku më i njohur rus për pronësinë e tij të Klubit të Futbollit Chelsea.
Sanksionet ndaj Eugene Tenenbaum dhe David Davidovich e çojnë numrin e përgjithshëm të oligarkëve, anëtarëve të familjes dhe bashkëpunëtorëve me lidhje me Rusinë në listën e Mbretërisë së Bashkuar në 106, njoftoi qeveria të enjten.
Sipas qeverisë, dosjet e korporatave tregojnë se Tenenbaum, drejtor në Chelsea, mori kontrollin e Ervington Investments, mjet investimi i lidhur me Abramovich, më 24 shkurt, ditën kur Vladimir Putin dërgoi trupa në Ukrainë.
Më pas, Davidovich mori përsipër Ervington Investments nga Tenenbaum muajin e kaluar, tha qeveria, duke shtuar se Davidovich përballet me një ndalim udhëtimi, si dhe me ngrirjen e aseteve.
Sekretarja e Jashtme e Mbretërisë së Bashkuar, Liz Truss, e quajti veprimin “më të madh të ngrirjes së aseteve në historinë e Mbretërisë së Bashkuar”.
Shkalla e ngrirjes tregon se sa nga pasuria e tij ka investuar Abramovich në Britani, kryeqyteti i së cilës u quajt “Londongrad” për përqafimin e oligarkëve rusë në fillim të viteve 2000.
10 miliardë paund, që ka ngrirë Mbretëria e Bashkuar, është më e lartë se disa vlerësime kryesore të vlerës totale neto të oligarkut rus, me Forbes që e vendos atë në 8.2 miliardë dollarë.
Raundi i ri i sanksioneve vjen një ditë pasi një gjykatë në ishullin Channel të Jersey vendosi një urdhër për ngrirjen e më shumë se 7 miliardë dollarëve në asete të lidhura me Abramovich.
Qeveria e Mbretërisë së Bashkuar tha se e bashkërendoi veprimin e saj me autoritetet e Jersey.
“Ne po shtrëngojmë rrotën e makinës së luftës së Putinit dhe po synojmë rrethin e njerëzve më të afërt me Kremlinin”, tha Truss. “Ne do të vazhdojmë me sanksione, derisa Putini të dështojë në Ukrainë. Asgjë dhe askush nuk është jashtë tryezës”.
Chelsea nuk pranoi të komentonte, pasi “Financial Times” i bëri një kërkesë Tenenbaum përmes klubit. Davidovich nuk mund të kontaktohej për koment.
Të dy janë ndër togerët më jetëgjatë të Abramovich-it, pasi që të dy kanë punuar në Sibneft, kompania e naftës që oligarku i shiti shtetit rus në 2005 në një marrëveshje prej 13 miliardë dollarësh që çimentoi pasurinë e tij.
Tenenbaum ka qenë në bordin e Chelseas që nga viti 2003, kur Abramovich bleu klubin e Premier League që tani po e shet.
Një biografi në faqen e internetit të Chelsea-s përshkruan Tenenbaum si një nga “bashkëpunëtorët më të afërt” të Abramovich-it.
Sanksionet ndaj Tenenbaum vijnë në të njëjtën ditë kur ofertuesit që konkurrojnë për të blerë Chelsean do të dorëzojnë ofertat e tyre të rishikuara, me një seri miliarderësh të Amerikës së Veriut që konkurrojnë për një klub të financuar nga Abramovich për dy dekadat e fundit.
Regjistrimet në bursën e Londrës muajin e kaluar zbuluan se Abramovich kishte transferuar entitete që mbanin investime në kompani të listuara në Britani ndaj Davidovich-it, ashtu edhe Tenenbaum-in, pas pushtimit të Ukrainës.
Davidovich tani kontrollon Norma Investments në Ishujt e Virgjër Britanikë, një nga mjetet kryesore të investimeve të oligarkut – emri i të cilit është anagrami i Romanit. Ajo zotëronte përfundimisht një nga superjahtet e tij, si dhe aksione në kompanitë britanike.
Regjistrimet e korporatave në Mbretërinë e Bashkuar rendisin Davidovich si banues në Izrael dhe Tenenbaum në Jersey.
