Zyrtarët e turneut të tenisit Wimbledon që zhvillohet në Britaninë e Madhe kanë planifikuar të mos lejojnë pjesëmarrjen e sportistëve nga Rusia dhe Bjellorusia, raporton prestigjozja “New York Times”.
Vendimi i britanikëve vjen për shkak të pushtimit rus të Ukrainës. Ndërsa, për Bjellorusinë si mbështetëse e luftës.
“All England Club” organizon turneun dhe një zyrtar i lartë i saj tha të martën se sporistët rusë dhe bjellorusë nuk do të marrin pjesë.
Wimbledon, një nga katër turnet Grand Slam, është planifikuar të fillojë në fund të qershorit.
Një vendim i tillë do të shikone disa prej lojtarëve më të mirë të tenisit në botë jashtë turneut. Rusia ka katër meshkuj në 30-shen më të mirë të tenisit. Këtu përfshihet edhe numri “2” në botë, Daniil Medvedev. Kampioni në fuqi i U.S Open për meshkuj në përballjet teke.
Rusia ka gjithashtu pesë femra në top 40-shen e renditjes së turneut WTA, të udhëhequra nga numri “15” në botë, Anastasia Pavlyuchenkova.
Aryna Sabalenka nga Bjellorusia renditet në vendin e “4” dhe ishte gjysmëfinaliste e Wimbledon vitin e kaluar. Bashkatdhetarja e saj, Victoria Azarenka, ish-numri “1”, renditet në vendin e 18-të.
Pas fillimit të luftës në Ukrainë, organizatorët e tenisit profesionist ndaluan sportistët rusë dhe bjellorusë në ngjarjet ekipore si Kupa Davis dhe Kupa Bille Jean King. Të dy kupat u fituan nga ekipet ruse vitin e kaluar.
Disa ngjarje tenisi janë pezulluar ne Rusi dhe Bjellorusi. Federata Ndërkombëtare e Tenisit (ITF) njoftoi gjithashtu pezullimin e Federatës Ruse të Tenisit dhe Federatës së Tenisit Bjellorus.
Megjithatë, sportistët rusë dhe bjellorusë janë lejuar të luajnë në turnet e ITF-së, por pa përdorur simbolet kombëtare, flamurin dhe himinin.
Wimbledon, turneu më i vjetër i Grand Slam-it, ka të ngjarë të jetë një problem i veçantë për këtë çështje.
French Open, i cili fillon muajin e ardhshëm dhe është turneu i ardhshëm Grand Slam në kalendar, nuk ka treguar se synon të ndalojë lojtarët individualë. As US Open, i cili do të mbahet në Nju Jork në fund të gushtit dhe në fillim të shtatorit.
Wimbledon, i cili fillon më 27 qershor në Londër, ka qenë nën presion të konsiderueshëm nga qeveria britanike, e udhëhequr nga kryeministri, Boris Johnson, për të mbajtur qëndrim ndaj rusëve dhe bjellorusëve.
Nigel Huddleston, ministri britanik i sportit, tha në një seancë parlamentare muajin e kaluar se lojtarët rusë si Medvedev-i mund të kenë nevojë të japin “garanci” se nuk e mbështesin Presidentin Vladimir Putin-in në mënyrë që të luajnë në Wimbledon.
Wimbledon nuk i ka ndaluar atletët individualë nga vende të veçanta që nga pasojat e Luftës së Dytë Botërore, kur lojtarët nga Gjermania, Japonia dhe kombe të tjera nuk u lejuan të luanin në turne.
