Nga Chris Mason, BBC
Kryeministri britanik, Boris Johnson i mbijetoi mbrëmë një mocioni mosbesimi nga partia e tij, duke marrë mbështetjen e 211 ligjvënësve. Por 148 deputetë ishin kundër tij, një numër i konsiderueshëm.
Johnson ishte përballur me muaj të tërë me vështirësi për të lënë pas skandalet për shkeljen e rregullave, në veçanti për festat në godinat qeveritare gjatë masave izoluese për COVID-19. A është koha për të ecur para, apo rënia e Johnson sapo ka nisur?
Rregulli i parë i politikës: mësoni si të numëroni. Matematikisht, Johnson ishte fitues në mocionin e mosbesimit të hënën.
Rregulli i dytë i politikës: numrat shpesh nuk tregojnë të gjithë historinë. Mund të pretendoni fitoren dhe t’ju grabitet autoriteti në të njëjtin moment.
Historia na tregon disa gjëra: Sir John Major në vitin 1995 dhe Theresa May në vitin 2018, fituan dy mocione mosbesimi me një përqindje më të madhe të deputetëve mbështetës.
Sir John u shkatërrua në zgjedhjet e përgjithshme dy vjet më vonë. Zonja May u largua nga pushteti gjashtë muaj më vonë.
Tani ka një ndryshim: Boris Johnson mund të tregojë fillimisht shumicën dërrmuese të fituar në zgjedhjet e fundit.
Por e vërteta e thjeshtë është se kur më shumë se katër nga dhjetë deputetët tuaj mendojnë se vendi do ishte më mirë pa ju, atëherë ju keni një problem.
