Të shtunën në mbrëmje në Galeri Ambigu në Montreal u dha premiera e filmit “The shot“– “Shkrepja “. Pas një turi të suksesshëm në disa shtete të Amerikës, filmi njohu publik shqiptar edhe në provincën e Quebec në Kanada.
Me regji dhe skenar të Herion Mustafaraj, “The shot“ na ktheu në Shqipërinë e vitit 1905. Ngjarje të vendosura në Labëri, që në nisje të saj na prezanton me trashëgiminë shpirtërore të zonës, me kostumografinë, me polifoninë, ndoshta edhe si e vetmja kryevepër e vlerës së trashëgimisë së njerëzimit mbrojtur nga UNESCO.
Foto të shkëputura nga seti i xhirimeve të filmit “The shot“
Ema, një fotografe nga Britania e Madhe ka udhëtuar në Shqipërinë e pas shkëputjes nga sundimi Osman për të përjetësuar në objektivin e saj jetesën, zakonet, doket, ndoshta edhe për të prezantuar disa elemente të botës perëndimore të cilat janë krejt të panjohura për kulturën tonë të atyre viteve. Por as asaj s’ia kish mar mendja së çfarë do të fitonte nga varfëria e një populli.
Protagonisti kryesor Noar, i magjepsur pas vlerës së një shkrepjeje do ta realizojë me çdo kusht për ta patur të tijën një foto familjare, cilado qoftë haraçi për ta paguar, është krejt i qartë se për të trashëguar emrin, historinë, por edhe për të mbajtur fjalën e dhënë, kjo shkrepje do të flasë më shumë.
Filmi na tregon diskrimimin klasor në shoqëri, sesa shumë të rrit autoritetin fals një flori i vogël, një truall më shumë, një kostum më i ri.
Tregohet roli i gruas dhe guximi i saj, rëndësia e besës dhe fjalës së dhënë, flet shumë se djali është trashëgimtari i duhur, se as lufta me kaçakët nuk do ta pengojë që një familje të ketë një hero.
Përpos gjithë varfërisë që e karakterizon shoqërinë, “Shkrepja“ motivon një familje të tregojë kostumet e reja, të pozojë më bukur përpara kameras, të tregojë se e vlerëson jo vetëm punën e udhëtarit-fotograf por edhe gjurmën që kërkon të lërë në një foto që do të përmbledhë rrëfimin e historisë së kulturës së shoqërisë të vendosur nga jug të Shqipërisë.
Me një kast të përzgjedhur aktorësh si Bujar Asqeriu, Lulzim Zeqja, Ermira Hysaj e Nadia Mançe, filmi me metrazh të shkurtër “The shot“ , do të vazhdojë të bëj turin e saj kinematografik edhe për publikun shqiptar në Europë dhe më tej, në të njëjtën kohë do të jetë pjesë në disa festivaleve kinematografike botërore.
Galeri Ambigu bën me dije se meqë nuk u arrit të plotesoheshin të gjitha kërkesat e të interesuarve për të ndjekur premierën e filmit atë mbrëmje, për shkak të tejkalimit të kapacitetit të sallave brenda ambjenteve të galerisë, filmi do të rishfaqet të mërkurën e datën 8 Qershor, ora 8 pm, në nje tjetër mbrëmje kulturore ku pritet të jenë të pranishëm ambasadorët e Shqipërisë dhe i Kosovës në Kanada.
