Lajmi i rremë për tërmet për zëdhënësen e qeverisë Elisa Spiropali nuk ishte thjesht për klikime, por ishte një thirrje për destabilitet dhe kaos. Gjatë një interviste televizive, Spiropali tha se lajmi në portal është abuziv dhe kriminal.
“Kjo është ana jonë e errët, ishte kriminale, e turpshme dhe piku i të gjithë kësaj shpërfilljeje që shumë prej portaleve i bëjnë lirisë fjalës dhe të drejtës së informimit. Është abuzive. Nuk jam dakord që është bërë për klikime, po për të terrorizuar e destabilizuar njerëzit”. theksoi ajo.
“Është thirrje për destabilitet dhe kaos, se njerëzit do dalin në rrugë, se kanë instiktin për t’u mbrojtur, por përgjegjësia e medias dhe politikës është të ketë filtra kontrolli. Deri ku mund të shkohet për të trembur njerëzit. Janë mjete primitive kriminale”, tha zëdhënësja e qeverisë.
Sipas Spiropalit, nuk janë vetëm portalet, por ka edhe figura të larta të shtetit që flasin për parashikime dhe kanë strategji për të luftuar kundërshtarin. Ajo apelon që të hiqet dorë nga këto mënyra ndërsa i bën apel medias që të ketë ketë filtër dhe autoritet që merret me etikën.
“Po kemi figura të larta të shtetit që flasin për parashikime dhe kanë strategji politike. Të hiqet dorë nga strategjia e përdorimit të çdo mjeti për të luftuar kundërshtarin për të gjetur gabime dhe për të krijuar alibi. Ne do i shkojmë deri në fund. Mediet të kenë filtër dhe autoritet që merret me etikën. Janë kthyer në makineri të pavërtetash për të sulmuar kundërshtarin”, tha Spiropali./Atsh/