Kryeministri i Shqipërisë, Edi Rama shprehu sot mirënjohjen për stafin e mjekëve dhe infermierëve në dy maternitetet e Tiranës, të cilët në momentet e tërmeteve rendën drejt inkubatorëve të bebeve të porsalindura dhe shtretërve të nënave lehona e të grave shtatzëna.
“Mirëmëngjesi dhe me mirënjohjen e thellë, për këto gra të jashtëzakonshme, të cilat kur tundej toka nga tërmeti e të gjithë vraponin të dilnin jashtë nga shtëpitë, dyqanet, restorantet e çdo vend i mbyllur ku i gjeti goditja e frikshme sizmike, rendën drejt inkubatorëve të bebeve të porsalindura dhe shtretërve të nënave lehona e të grave shtatzëna, ju uroj një ditë mbarë”, tha Rama.
Ministrja e Shëndetësisë dhe Mbrojtjes Sociale, Ogerta Manastirliu vizitoi stafin e dy materniteteve në kryeqytet, të cilët reaguan me profesionalizëm të lartë gjatë momenteve të tërmetit të së shtunës.
“Vij këtu me porosi të kryeministrit për t’ju falënderuar me shumë mirënjohje, me shumë respekt, për punën që keni bërë, për profesionalizmin, angazhimin, sakrificën, që meriton vetëm respekt dhe t’ju them se ne jemi gjithmonë në një borxh me ju”, tha Manastirliu.
Duke kujtuar momentet e tërmetit, doktoreshë Anikla Dokle u shpreh se “kemi funksionuar si një dorë, si një grusht i vetëm. Natyrisht që nuk patëm asnjë dëm në njerëz, por patëm një përfitim të jashtëzakonshëm, sepse në jetë kanë ardhur atë ditë 15 bebe si drita e diellit të shëndetshëm”.
“Gjëja e parë që ne bëmë ishte sigurimi i bebave dhe më pas kur u qetësua gjendja qetësuam nënat, pasi ato u trembën shumë”, tha një mjeke.
“Një grua ishte duke lindur kështu që unë detyrimisht nuk mund ta lija vetëm”, tha një mamie.
Një tjetër u shpreh se nuk kishte qenë në punë atë ditë, por vendosi të lërë familjen dhe të vij në punë. “E ndieja, nuk më tha njeri, ne kështu jemi rritur, me këtë ndërgjegje”.
“Kishim familjen, dy vajzat e mia 10 dhe 3 vjeçe që i harrova në ato momente sepse përpara kishim pavionin plot me gra që duheshin mbështetur dhe hequr nga paniku”, u shpreh një tjetër.
Në maternitetin “Mbretëresha Geraldinë”, ministrja Manastirliu u shpreh se pas aktivizimit të menjëhershëm të planit të emergjencës, ajo që u vu re nga gjithë ekipi mjekësor ishte gatishmëria, ishte shpirti i sakrificës që në momentin e parë pas lëkundjeve të para dhe të gjithë meritoni respekt, mirënjohje, falënderime pa fund”, tha ajo.
“U munduam që të gjitha bebet që ishin në reanimacion t’i merrnim secila nga një bebe dhe të vraponim që t’i siguronim. Ajo që na interesonte në atë momente ishte vetëm siguria e bebit”, tha një infermiere.
“Pasi u zbraz gjithë kati i tretë, unë ndejta aty se ishin gra të operuara. U mundova sadopak t’i ndihmoj bashkë me shoqet e mia sigurisht”, tha një tjetër.
