Ka zgjatur më pak se 1 orë seanca e sotme plenare në Kuvend, e para që zhvillohet pas zgjedhjeve vendore të 14 majit. Në këtë seancë u miratuan dy projektligje, për ndërtimin e urës ndërkufitare mbi lumin Buna dhe projektligj për ratifikimin e marrëveshjes së huas, ndërmjet Shqipërisë dhe qeverisë gjermane, ndërsa pas votimit, opozita u largua nga seanca.
Nga foltorja e Kuvendit, Kreu i Grupit Parlamentar të Partisë Socialist e konsideroi “çmenduri” veprimin e opozitës, ndërsa i kërkoi atyre të bashkëpunojnë për të gjetur dakordësi për një sërë çështjesh, duke përmendur edhe zgjedhjen e Avokatit të Popullit.
“Ne jemi këtu për të thënë se do dimë ta lexojmë këtë mbështetje të madhe dhe inkurajim për të shkuar përpara. Historia që në këto vite humbësi e sheh fajin te kundërshtari dhe asnjëherë nuk bën një analizë të vetën për të kuptuar se çfarë ka bërë gabim, të insistosh në të njëjtin gabim është çmenduri. E kemi nisur Kuvendin me 2 vendime të rëndësishme, i pari për investimin që i jep Shkodrës një lidhej të re me Ulqinin, ura mbi Bunë që na jep mundësinë që diçka që na ka munguar prej shumë kohësh, i jep Shkodrës një qasje të re në një treg edhe më të madh të turizmit. Ndërkohë pika tjetër lidhet me një marrëveshje me Qeverinë Gjermane me pjesën më të madhe të bashkive, të gjitha qarqet kanë akses në këtë marrëveshje të re për të përmirësuar strukturën rrugore. Janë dy projektligje të rëndësishme dhe apeli im është që opozita t’i rikthehet punës në Kuvend dhe të punojmë bashkë për shumë çështje me rëndësi. Jemi gati të vijojmë bashkëpunimin tonë për çështje me rëndësi. Të mbyllim edhe procesin e zgjedhjes së Avokatit të Popullit. Nga e hëna do i kërkojmë opozitës të ulemi për të dakordësuar kandidatin që do të jetë edhe Avokati i Popullit”, tha Balla.
Ura 310 metra e gjatë do të shkurtojë rrugën nga Mali i zi drejt Shqipërisë duke kaluar nga Ulqini drejt Velipojës, nga 70 kilometra në vetëm disa kilometra. Kostoja e urës dhe pikës kufitare do të shkojë deri në 20 milionë euro dhe do të ndahet 50% me 50%.
