Ministri i Jashtëm i Maqedonisë së Veriut dhe kryesues i OSBE-së, Bujar Osmani, prezantoi të dielën në Shkup një plan prej 9 pikash, për deeskalimin e situatës në veri të Kosovës.
Planin ai ua prezantoi shefave të misionit të OSBE-së në Kosovë, Serbi dhe në Maqedoninë e Veriut.
Këtë plan, në vija të përgjithshme, por edhe përparësitë e kryesimit nga Maqedonia e Veriut e kryesimit të OSBE-së, ai i ka publikuar edhe në faqen e tij në Facebook.
Maqedonia e Veriut duket se dëshiron të paraqitet si një shembull suksesi në rajon dhe më gjerë me Marrëveshjen e Ohrit që i dha fund konfliktit të vitit 2001 dhe në këtë vijë edhe me organizimin e pritjes së takimit të Ohrit më 18 mars midis Kryeministrit Kurti dhe Presidentit Vuçiç me ndërmjetësimin e Shefit të Politikës së Jashtme të BE-së Josep Borrel dhe të dërguarve evropianë e amerikanë, Miroslav Lajçak dhe Gabriel Escobar.
Osmani informon se situata në veri të Kosovës dhe marrëdhëniet mes Serbisë dhe Kosovës ishin në fokus të takimit të sotëm me shefat e misioneve të OSBE-së në Serbi, Kosovë dhe Shkup, Jan Bratu, Majkëll Devenport dhe Kilian Vall. Plani, sipas tij, është identik me udhërrëfyesin e Bashkimit Evropian të mbështetur edhe nga Shtetet e Bashkuara.
“Ishte inkurajuese të dëgjosh mendimet e tyre mbi perspektivat e mundshme të planit 9-pikësh për deeskalimin e situatës që paraqita si Kryesues i OSBE-së. Udhërrëfyesi i ofruar nxit atmosferë dialogu dhe bashkëpunimi. Krahas kësaj, pata mundësinë të prezantoj prioritetet e Kryesimit tonë të OSBE-së të fokusuar në Europën Juglindore që synojnë forcimin e besimit, luftën kundër korrupsionit dhe veprimin klimatik. Pajtimi është i një rëndësie të veçantë si një hap kyç drejt arritjes së paqes së qëndrueshme dhe bashkëpunimit në rajon. Falënderim i veçantë për ambasadorët Bratu, Davenport dhe Vall për punën dhe përkushtimin e tyre shumë të çmuar në përpjekjet për stabilitet dhe prosperitet.”- shkruan Osmani.
Shefi i diplomacisë në Shkup shpreson se plani prej 9 pikash, do të gjejë zbatim tek palët.
Po cili është thelbi i këtij plani?
Zëri i Amerikës raporton se plani parashikon që Kosova dhe Serbia të riafirmojnë përkushtimin për zbatimin e marrëveshjes bazë të Brukselit dhe aneksit të Ohrit.
“Dialogu nuk ka alternativë, marrëveshjet duhet të implementohen. Pika të tjera të udhërrëfyesit kanë të bëjnë drejtëpërdrejtë me shtensionimin e situatës në veri të Kosovës dhe nënkuptojnë: tërheqjen e menjëhershme të forcave speciale të Kosovës nga veriu i Kosovës. Policia e rregullt bashkë me KFOR-in dhe organizatat tjera të mbajnë rendin në veri. Kurse, Serbia të ulë nivelin e gadishmërisë ushtarake në veri të Kosovës. Të shpallen zgjedhje të reja në këto katër komuna, me qëllim të pjesëmarrjes së komunitetit Serb, që do rikthejë legjitimitetin. Të krijohet besimi dhe rikthimi i komunitetit serb në institucionet e Kosovës. OSBE-ja është e gatshme të ndihmojë vetëm me ekspertizë, me këshilla dhe natyrisht me krijim të mirëbesimit për përfshirjen e komunitetit serb atje, me fokus tek të rinjtë”,- tha Osmani në këtë takim.
Udhërrëfyesi i hartuar nga Maqedonia e Veriut
-Kosova dhe Serbia të riafirmojnë përkushtimin për zbatimin e marrëveshjes bazë të Brukselit dhe aneksit të Ohrit.
-Të bëhet tërheqja e menjëhershme e forcave speciale të Kosovës nga veriu i Kosovës.
-Policia e rregullt, bashkë me KFOR-in dhe organizatat tjera të mbajnë rendin në veri.
-Serbia të ulë nivelin e gatishmërisë ushtarake në veri të Kosovës.
-Të shpallen zgjedhje të reja në katër komunat.
-Të krijohet besimi dhe rikthimi i komunitetit serb në institucionet e Kosovës.
