Pas tradhëtisë së Lukakut, Inter po mendon të hakmerret ndaj futbollistit belg dhe është shumë pranë zyrtarizimit të Juan Cuadrados. Mediat italiane e bëjnë të sigurt se kolumbiani ka gjetur akordin me zikaltërit dhe është vetëm një hap larg kalimit në Milano.
Siç raportohet, Inter i ka ofruar një kontratë 1-vjeçare nga e cila do të përfitojë 2,5 milionë euro, një ofertë që e ka joshur kolumbianin dhe ka pranuar të bëhet pjesë e skuadrës zikaltër, ndërsa brenda kësaj jave do të hedhë dhe firmën në kontratën e re.
Cuadrado luajti me fanellën e Juventusit që nga viti 2015, ndërsa mbajti shiritin e kapitenit dhe në disa ndeshje me fanellën bardhezi. Edhe tifozët juventin nuk janë pajtuar me këtë transferim, ndonëse lojtari vjen si transferim i lirë tek Interi pasi kontrata me Juven i përfundoi këtë verë.
Ai kishte oferta dhe nga Amerika apo Arabia Saudite, por dëshira e tij ishte të qëndronte në Europë. Me shumë gjasa, brenda kësaj jave, 35-vjeçari do të mbërrijë në Milano për të vendosur detajet e fundit të marrëveshjes dhe më pas të hedhë firmën në kontratën e re.
