Në një fushatë tashmë të shënjuar nga premtime të shtrenjta, debati i djeshëm mes kryeministrit konservator, Boris Johnson dhe rivalit të tij laburist Jeremy Corbyn sugjeron për një tejkalim të premtimeve elektorale.
Ja disa prej premtimeve kryesore deri më tani nga dy liderët:
Brexit
“Do ta realizoj Brexit-in”, këmbëngul Boris Johnson, i cili ka arritur një marrëveshje daljeje nga BE, që bën të mundur marrjen në dorë të kontrollit të parave, ligjeve dhe kufijve britanikë, siç është dëshira e 52 % të britanikëve, që votuan për Brexit-in në referendumin e vitit 2016. Nëse ai fiton një shumicë parlamentare, ai merr përsipër që kjo marrëveshje të ratifikohet nga Parlamenti dhe të largohen nga BE deri në fund të janarit, dhe për të krijuar një marrëveshje të re tregtare me BE para përfundimit të një periudhe tranzicioni deri në dhjetor 2020.
Jeremy Corbyn premton të rinegociojë marrëveshjen e Brexit me Brukselin, për të mbrojtur vendet e punës, të drejtat e punëtorëve dhe mjedisin, një marrëveshje të cilën pretendon t’ia nënshtrojë votës së britanikëve brenda gjashtë muajve të mbërritjes së tij në Downing Street, nëpërmjet një referendumi, duke ofruar gjithashtu edhe mundësinë e anulimit të Brexit-it.
Emigracioni
Boris Johnson kërkon t’i japë fund lëvizjes së lirë të personave dhe ta kontrollojë emigracionin nëpërmjet një sistemi të bazuar në modelin australian.
Jeremy Corbyn nuk e ka saktësuar ende pozicionin e laburistëve, duke deklaruar vetëm se qeveria laburiste do të lejonte lëvizje të shumta migratore.
Shërbimet publike
Të dyja partitë kanë premtuar miliarda paund për shërbimet publike (spitale, shkolla, rrugë). Laburistët vënë theksin te mjedisi, kurse partia konservatore premton të rekrutojë 20 000 oficerë policie, si edhe të shpenzojë më shumë para për shërbimin shëndetësor publik.
Laburistët, të drejtuar nga Jeremy Corbyn, shumë më në të majtë, premtojnë nacionalizim të hovshëm në infrastrukturë, përfshirë hekurudhat, ujin, energjinë elektrike e internetin, si edhe investime në shërbimet publike, për të kthyer faqen e dhjetë viteve kursim nën qeveritë e ndryshme konservatore.
Sipërmarrjet
Boris Johnson premton ulje të taksave, e vlerësuar kjo deri në një miliard paund në vit, por që do t’i rikthehet premtimit për uljen e tarifave mbi korporatat. Ashtu sikurse Jeremy Corbyn, ai premton ulje të taksave mbi pasuritë e patundshme për bizneset.
Kreu i laburistëve, gjithashtu, kërkon të vërë në zbatim masa mbështetëse për programet e të nxënit me kah drejt një zhvillimi të qëndrueshëm./
