Sekretari i Jashtëm i Mbretërisë së Bashkuar ka mbërritur në Abu Dhabi për të diskutuar ndihmën humanitare për njerëzit në Gaza. James Cleverly do të takohet me homologun e tij Sheikh Abdullah bin Zayed gjatë vizitës së tij, shkruan Sky News.
“Ne jemi duke punuar gjerësisht me egjiptianët, me izraelitët dhe të tjerët për të provuar të kemi një pauzë humanitare, një pauzë të përkohshme, në mënyrë që të mund të marrim atë ndihmë humanitare për njerëzit,” tha zoti Cleverly.
“Ne kemi nevojë për një rritje të konsiderueshme të volumit”, tha ai.
Trupat izraelite janë shtyrë më thellë në Rripin verior të Gazës, duke arritur në zonat e ndërtuara, ndërsa sulmet ajrore të paralajmëruara nga OKB-ja po godasin më afër spitaleve. Operacionet e intensifikuara tokësore erdhën një ditë pasi 33 kamionë që transportonin ushqime, ilaçe dhe furnizime të tjera hynë në Gaza nga Egjipti në kolonën më të madhe të ndihmave humanitare që nga fillimi i konfliktit. Por punonjësit e ndihmave kanë thënë se ajo ende nuk ka përmbushur nevojat e Gazës, e cila ka qenë nën rrethim për javë të tëra.
