E mbarë bota përkujton sot viktimat e gjenocidit të kryer nga forcat serbe në Srebrenicë të Bosnje dhe Hercegovinës.
Kjo vjen për herë të parë pas miratimit të rezolutës në Kombet e Bashkuara që caktoi 11 korrikun si datë përkujtimi dhe që dënon ata që e mohojnë apo glorifikojnë kriminelët e luftës së përgjakshme. Në Qendrën Përkujtimore të Potoçarit kujtohet me dhimbje të madhe 29-vjetori i gjenocidit kundër boshnjakëve në dhe rreth Srebrenicës, i kryer nga forcat serbe në korrik të vitit 1995.
Eshtrat e 14 viktimave të identifikuara të Srebrenicës u vendosen në këtë qendër, ku prehen edhe mijëra viktima të tjera. Të mbijetuarit, përmes dëshmive të dhëna për televizionin publik të Bosnje dhe Hercegovinës, rrëfejnë dhunën dhe horrorin e përjetuar nga forcat serbe.
“Dhimbja nuk përshkruhet dot me fjalë. Imagjinoni të ju shuhet e gjithë familja në një ditë…..Isha vetëm 19 vjeç”, tregon Jasna Tuholjkiç, që vetëm sot i dha lamtumirën e fundit babait dhe dy vëllezërve të saj, 29 vite nga masakrimi i tyre.
Pas një lufte të madhe diplomatike dhe me deklarata, është përkulur edhe Millorad Dodik, president i Republika Srpska, i cili shprehu ngushëllime për familjet e boshnjakëve që u vranë në Srebrenicë. Por ai refuzoi ta quajë masakrimin e mbi 8 mijë djemve dhe burrave një gjenocid.
Gjykata e Hagës për Krimet e Luftës në ish Jugosllavi dhe gjykatat në Bosnje dhe Hercegovinë, Serbi dhe Kroaci deri më tani kanë dënuar 47 persona me më shumë se 700 vjet burg për, sipas formulimit të Tribunalit të Hagës, “gjenocid, krime kundër njerëzimit dhe krime të tjera të kryera në Srebrenicë në korrik 1995”.
Me burgim të përjetshëm në Hagë u dënuan dhe dy kriminelët Ratko Mlladiç dhe Radovan Karaxhiç.
