Ministri në detyrë i Punëve të Brendshme në Kosovës, Xhelal Sveçla ka reaguar lidhur me vrasjen e Muhamed Lika, efektivi i policisë në Kosovë, i cili u qëllua me armë mbrëmjen e kaluar jashtë ambienteve të banesës së tij.
Sveçla, ka deklaruar se hetimet për zbardhjen e plotë të ngjarjes vazhdojnë. Po ashtu ka bërë thirrje që autori të dorëzohet.
Lidhur me këtë ngjarje hetimet vijojnë, ndërsa mediat në Kosovë kanë raportuar se ka dyshime që të ketë ndodhur një grabitje.
Reagimi i plotë:
Sulmi ndaj çdo pjesëtari të Policisë së Kosovës është sulm i drejtpërdrejtë ndaj rendit, institucioneve dhe sigurisë së Republikës së Kosovës. Vrasja e mbrëmshme e rreshterit të Policisë së Kosovës, Muhamed Lika, ka prekur rëndë secilin prej nesh dhe gjithë Policinë e Kosovës. Që nga momenti që kam marrë lajmin jam në komunikim të vazhdueshëm me policinë, me kërkesën që sa më parë të zbulohet vrasësi dhe të gjitha rrethanat e këtij krimi.
Ftoj dorasin apo dorasit që sa më parë të dorëzohen në organet e rendit, meqë i gjithë aparati shtetëror pa hezitim dhe pa kursim është i mobilizuar të zbulojë dhe arrestojë të gjithë ata që janë përfshirë në këtë vrasje. Kontributi i rreshter Muhamedit si në çlirimin e vendit ashtu edhe në garantimin e rendit dhe sigurisë për të gjithë qytetarët tanë, do të mbetet shembull për secilin zyrtar policor në shërbim. I shpreh ngushëllimet e mia më të sinqerta familjes së rreshter Muhamedit, zyrtarëve të Policisë së Kosovës dhe të gjithë atyre që e kanë pasur fatin të njihnin atë.
U prehtë në paqe në tokën e Republikës së Kosovës së cilës i shërbeu gjithmonë me vullnet e guxim!
