Më shumë se 10,000 emigrantë kanë mbërritur në Mbretërinë e Bashkuar që nga fillimi i vitit, duke kaluar Kanalin i La Manshit me varka të vogla, një numër i paprecedentë për këtë periudhë të vitit, sipas të dhënave nga Ministria e Brendshme Britanike.
Deri tani, 10,335 persona kanë arritur në tokën britanike, duke tejkaluar për herë të parë kufirin e 10,000 mbërritjeve që nga 2018. Në vetëm një ditë, të hënën, 473 emigrantë mbërritën me 8 anije të ndryshme.
Qeveria britanike, përkundër premtimeve për të ndaluar këtë fenomen, ka dështuar të reduktojë numrin e emigrantëve që kalojnë në mënyrë të paligjshme.
Sekretarja e Brendshme, Yvette Cooper, ka komentuar se rrjetet e kontrabandistëve kanë përfituar nga kushtet e favorshme të motit dhe ka mbrojtur masat e qeverisë për të luftuar këtë fenomen.
Ajo njoftoi gjithashtu një amendament në projektligjin e imigracionit që do të parandalonte abuzuesit seksualë të merrnin azil në Mbretërinë e Bashkuar.
Po ashtu, autoritetet britanike po punojnë për të përmirësuar bashkëpunimin me Francën në përpjekjen për të parandaluar kalimin e emigrantëve. Ministria e Brendshme e Francës ka konfirmuar se po shqyrton ndryshime, duke u mundësuar forcave të sigurisë të ndërhyjnë më afër bregdetit për të ndaluar anijet që nisen drejt Britanisë.
