Gjatë vizitës së tij në Kiev, princi britanik, Harry vizitoi vendin e një sulmi rus, njoftoi agjencia ukrainase e lajmeve, Ukrinform duke cituar Tymur Tkachenko, shefin e Administratës Ushtarake të qytetit të Kievit.
“Sot na bashkohet princi Harry i BM, duka i Sussexit. Pata mundësinë t’i tregoj mysafirit tonë të shquar vendin e një prej sulmeve të Rusisë”, shkroi Tkachenko në një postim.
Tkachenko vuri në dukje se që nga fillimi i vitit, forcat ruse kanë vrarë 137 banorë të Kievit, përfshirë 12 fëmijë. Mbi 700 persona janë plagosur, përfshirë 46 fëmijë. Ai theksoi rëndësinë e partnerëve ndërkombëtarë që i kushtojnë vëmendje vuajtjeve të ukrainasve.
“Krah për krah me ne, duke ndarë pikëllimin tonë, janë partnerët dhe miqtë e Ukrainës. Jemi mirënjohës ndaj princit Harry për vëmendjen e tij ndaj dhimbjes sonë dhe për dhembshurinë e tij të sinqertë. Unë jam personalisht mirënjohës për çdo fjalë në mbështetje të Ukrainës dhe për veprimet e vërteta të ndërmarra për të ndihmuar fëmijët tanë dhe të plagosurit tanë”, shtoi Tkachenko.
Më parë, kryeministrja ukrainase Yuliia Svyrydenko diskutoi rehabilitimin e ushtarakëve ukrainas me princin Harry gjatë vizitës së tij dhe i tregoi atij dëmet e shkaktuara nga një sulm me raketa ruse ”Iskander” në ndërtesën qeveritare.
Më 12 shtator, princi Harry mbërriti në Kiev me ftesë të qeverisë ukrainase. Ai vizitoi Muzeun Kombëtar të Historisë së Ukrainës në Luftën e Dytë Botërore dhe u takua me veteranët ukrainas.
