Një ekip zhytësish nga kompania 1715 Fleet – Queens Jewels LLC ka zbuluar mbi 1,000 monedha ari dhe argjendi në fund të detit, në brigjet e Atlantikut të Floridës. Zbulimi, i vlerësuar në mbi 1 milion dollarë, mendohet se vjen nga një flotë spanjolle që u mbyt më 31 korrik 1715, ndërsa transportonte thesare nga kolonitë e Amerikës Latine drejt Spanjës.
Monedhat, të prera në Bolivi, Meksikë dhe Peru, mbajnë ende data dhe shenja të dukshme prerjeje, duke ofruar një vlerë të madhe historike për studiuesit dhe koleksionistët. Sipas drejtuesve të ekipit kërkues, ky është një nga zbulimet më të mëdha të viteve të fundit.
Ligji i Floridës përcakton që thesaret e zbuluara në ujërat shtetërore i përkasin shtetit, por kompanisë mund t’i lejohet një përqindje në kuadër të shërbimit të rikuperimit. Ndërkohë, autoritetet vazhdojnë të monitorojnë nga afër për të parandaluar vjedhjet dhe keqpërdorimet, si rasti i vitit të kaluar, kur dhjetëra monedha u vodhën nga një person i lidhur me ekipin kërkues.