Gjykata Penale e Maqedonisë së Veriut ka miratuar aktakuzën për tragjedinë e rëndë në klubin e natës “Pulse” në Koçan, ku humbën jetën 62 persona dhe mbi 150 u plagosën.
Këshilli Penal, pas shqyrtimit të provave dhe dëshmive, vendosi të pranojë aktakuzën në tërësi dhe të formojë një çështje të re gjyqësore Gjykata sqaroi se dy gjyqtare janë tërhequr nga çështja për shkak të konfliktit të interesit, ndërsa Prokuroria e Shkupit ka marrë përsipër përfaqësimin në gjyq.
Procesi nuk do të zhvillohet në Koçan, për shkak të mungesës së kushteve dhe është zhvendosur në Shkup, ku ende nuk është caktuar data e fillimit.
Sipas Gjykatës, kjo ndodh sepse dosja duhet të kalojë përmes sistemit elektronik AKMIS.
Në këtë proces akuzohen 37 persona, ndërsa mbi 250 janë shpallur të dëmtuar. Hetimet vazhdojnë edhe për policët dhe inspektorët e dyshuar për shkelje të mundshme gjatë kohës së ngjarjes.
Prokuroria e Krimit të Organizuar është përfshirë në një hetim të veçantë, i cili ende është në fazën para hetimore.
Tragjedia ndodhi më 16 mars, kur në ambientet e mbyllura të lokalit nisi një zjarr që përfshiu gjithë hapësirën. Sipas raportimeve, objekti nuk përmbushte kushtet e sigurisë dhe ishte jashtë standardeve ligjore.
Prokuroria njoftoi se hetimi është zgjeruar dhe janë përfshirë edhe punonjës të Drejtorisë së të Ardhurave Publike, që dyshohet se kanë neglizhuar kontrollet.
Deri tani nuk ka një datë të saktë për nisjen e gjykimit, por autoritetet thonë se rasti do të trajtohet me përparësi.
