Disa persona kanë humbur jetën dhe të tjerë rezultojnë të zhdukur pas një shpërthimi në një fabrikë municionesh në Tenesi, SHBA.
Fabrika Accurate Energetic Systems, ndodhet rreth një orë në jugperëndim të Nashville, Tenesi, në kufirin e qarqeve Hickman dhe Humphreys. Ajo është e specializuar në prodhimin e municioneve ushtarake.
Sherifi i qarkut, Chris Davis tha se janë regjistruar edhe disa shpërthime të vogla pas shpërthimit të parë të madh. “Ne kemi një hetim shumë të madh. Ndoshta do të jemi këtu për disa ditë“, tha ai.
Autoritetet po u kërkojnë të gjithëve njerëzve që të shmangin zonën ndërsa shërbimet e urgjencës janë në vendngjarje.
Kryebashkiaku i qarkut Hickman, Jim Bates tha se ka ende shumë pikëpyetje pas shpërthimit. Bates deklaroi se shkaku është ende i paqartë, por ndikimet në komunitet do të jenë të gjera.
“Është mjaft shkatërruese ta shohësh këtë. Përveç një shpërthimi të vogël municionesh në vitin 2014, objekti nuk ka pasur probleme sigurie“, tha ai.
Nuk dihet ende se çfarë e shkaktoi shpërthimin dhe as numri i saktë i njerëzve të pagjetur dhe i viktimave.
