Lëvizja Vetëvendosje ka bërë një reagim pa filtra për protestën që po organizohet në Tiranë në mbështetje të ish krerëve të UÇK. Përmes një deklarate zyrtare, partia e drejtuar nga Albin Kurti, kërkon reflektim nga të gjithë lidhur me qëndrimet karshi Gjykatës Speciale, veçanërisht nga ata që i konsideron si lobuesit më të mëdhenj për themelimin e saj.
“Para se të protestojnë, këta aktorë dhe politikanë duhet të tregojnë të paktën një minimum pendese për qëndrimet e tyre të gabuara në të kaluarën. Një shembull i qartë është vet Kryeministri aktual i Shqipërisë, Edi Rama, i cili madje kishte ardhur në Kosovë në vizitë emergjente me helikopter për të bindur palët këtu që të votonin pro themelimit të kësaj Gjykate”, njofton Lëvizja Vetëvendosje.
Vetëvendosje ka dhe një kërkesë të drejtpërdrejtë për shtetin shqiptar.
“Në anën tjetër, institucionet e Shqipërisë si shtet anëtar i OKB-së, i Këshillit të Evropës, i OSBE-së, i NATO-s e shumë pranë Bashkimit Evropian, kanë përgjegjësi dhe mundësi që këtë çështje ta ngrejnë në këto forume ndërkombëtare, aty ku flitet e vendoset për drejtësi, e jo në sheshin “Skënderbe” në Tiranë”, thekson Lëvizja Vetëvendosje.
Vetëvendosje njofton se nuk ka ndryshuar qëndrim si në 2015 ashtu edhe një dekadë më vonë, se “lufta e Ushtrisë Çlirimtare të Kosovës ka qenë e drejtë dhe e domosdoshme”. Gjithashtu partia e Kurtit e hedh poshtë pretendimin e Prokurorisë se brenda UÇK-së ka ekzistuar një grup kriminal duke nënvizuar se kjo “është e pasaktë dhe e padrejtë”.
“UÇK-ja nuk ka qenë ndërmarrje kriminale dhe nuk ka pasur struktura të tilla. Përkundrazi, për krime të luftës duhet të gjykohet Serbia, ajo është shkaktarja e gjenocidit dhe krimeve masive e sistematike ndaj popullit të Kosovës”, theksohet në deklaratën e Lëvizjes Vetëvendosje.
