Delegacioni i Bashkimit Europian në Shqipëri ka vlerësuar këtë të martë, më 25 nëntor, përfaqësimin e Shqipërisë nga kreu i Prokurorisë së Posaçme (SPAK), Altin Dumani në një takim trilateral të nivelit të lartë mes Bashkimit Europian, Amerikës Latine dhe Ballkanit Perëndimor, zhvilluar në Bruksel javën e kaluar.
Kjo është herë e parë që zhvillohet një format i tillë, i fokusuar në luftën kundër krimit të organizuar dhe trafikut të drogës.
Në aktivitetin e organizuar nga Komisioni Europian morën pjesë më shumë se 100 përfaqësues, përfshirë delegacione nga 18 shtete anëtare të BE-së.
Në këtë takim, Dumani theksoi “rezultatet konkrete të SPAK, të arritura në bashkëpunim me partnerët ndërkombëtarë dhe Agjencitë e BE-së, në identifikimin dhe analizimin e komunikimeve të enkriptuara të përdorura për koordinimin e aktiviteteve të paligjshme. Ky bashkëpunim ka çuar në arrestime të rëndësishme në Shqipëri dhe në gjithë Evropën, si dhe në goditjen e grupeve kriminale ndërkufitare, përfshirë ato me lidhje në Amerikën Latine”.
Mesazhi i tij, se vetëm një përgjigje e koordinuar mund të japë rezultate kundër rrjeteve kriminale që veprojnë globalisht, u përforcua fuqimisht si nga përfaqësuesit e BE-së, ashtu edhe nga pjesëmarrës të tjerë.
“Ata ranë dakord për nevojën e një bashkëpunimi edhe më të ngushtë gjyqësor dhe policor, përfshirë ndarjen e inteligjencës, hetimet financiare dhe analizën, si dhe punën e përbashkët në ekipe të përbashkëta hetimore”, thuhet në njoftimin e delegacionit të BE-së.
Sjellim gjithashtu ndërmend se në një tryezë të zhvilluar në Bruksel, nga European Policy Center, mbi sundimin e ligjit në veprim dhe roli i SPAK në avancimin e ambicieve të Shqipërisë për në Bashkimin Europian, Dumani rrëfeu se gjatë punës 6-vjeçare nuk kanë munguar kërcënimet nga krimi, apo edhe presionet e politikës ndaj prokurorëve.
“Vështirësi është menaxhimi i presioneve dhe i kërcënimeve të ndryshme nga politika, krimet, prokurorët e SPAK janë me përvojë dhe janë të përgatitur për t’i përballuar këto presione. Janë dhe maturuar dhe përballojnë këto presione.”, tha ai. Sipas Dumanit, pavarësia e institucionit ka qenë çelësi i fuqizimit të SPAK, i cili sot gëzon rreth 70% besim publik.
Dumani shprehej se SPAK ka arritur të ndërtojë një koalicion të gjerë në luftën kundër krimit të organizuar me vendet partnere, por edhe në Amerikën Latine.
