Bota e kinemasë dhe arteve marciale është në zi pas ndarjes nga jeta të legjendës Chuck Norris, i cili u shua në moshën 86-vjeçare.
Lajmi u konfirmua nga familja e tij përmes një deklarate zyrtare, ku thuhej se ai ndërroi jetë i rrethuar nga dashuria e të afërmve, ndërsa rrethanat e vdekjes janë mbajtur private.
Sipas raportimeve, ai ishte shtruar më parë në spital për një emergjencë mjekësore në ishullin Kauai.
Familja e përshkroi atë si një figurë të jashtëzakonshme: “Për botën ai ishte një artist i arteve marciale, një aktor dhe simbol force. Për ne ishte një bashkëshort i përkushtuar, një baba dhe gjysh i dashur dhe zemra e familjes sonë.”
I lindur më 10 mars 1940, Norris e nisi rrugëtimin e tij gjatë shërbimit në Forcat Ajrore të Shteteve të Bashkuara, ku u njoh me disiplinën Tang Soo Do, që do të shënonte fillimin e karrierës së tij sportive. Pas kthimit në SHBA, ai u bë një nga atletët më të mirë të kohës, duke fituar tituj të shumtë kombëtarë dhe ndërkombëtarë në karate. Më vonë, krijoi edhe stilin e tij të luftimit, Chun Kuk Do, një kombinim teknikash dhe filozofie lindore.
Suksesi i tij nuk u ndal vetëm në sport. Chuck Norris u bë një ikonë e kinemasë së aksionit, me role të paharrueshme në filma si Walker, Texas Ranger, The Delta Force dhe Missing in Action. Një nga momentet më të famshme të karrierës së tij mbetet përballja legjendare me Bruce Lee në Koloseun e Romës në filmin The Way of the Dragon.
Në vitin 1993, ai arriti sukses global me serialin “Walker, Texas Ranger”, duke u kthyer në një figurë të njohur për breza të tërë. Më vonë, fama e tij u rigjallërua në internet përmes fenomenit të “Chuck Norris Facts”, meme që e paraqisnin si një figurë pothuajse të pathyeshme, duke e kthyer në një mit modern të kulturës pop.
Ndarja nga jeta e Chuck Norris shënon fundin e një epoke për kinemanë dhe sportin, por trashëgimia e tij si kampion, aktor dhe ikonë do të mbetet e pavdekshme.
