Garda Revolucionare e Iranit ka paralajmëruar reagime të ashpra ndaj Shteteve të Bashkuara dhe aleatëve të tyre në rajon. Në një deklaratë për shtyp, Pasdaranët pretendojnë se kanë përballuar agresionin kriminal e terrorist dhe se kundërshtarët janë detyruar të kërkojnë armëpushim me Iranin. Ata deklarojnë se janë të gatshëm të mbrojnë vendin dhe të përdorin strategji dhe surpriza të reja në fushën e betejës.
“Gardat Revolucionare u përballën me agresionin kriminal dhe terrorist të Shteteve të Bashkuara dhe regjimit sionist, duke i bërë ata të bënin gabime gjykimi dhe të kërkonin një armëpushim me Iranin. Jemi të gatshëm të mbrojmë vendin dhe të krijojmë surpriza që tejkalojnë kuptimin dhe llogaritjet e armikut luftënxitës dhe të pabesë, duke përdorur karta të reja në fushën e betejës”, deklaroi Pasdaran.
Sipas tyre, çdo përshkallëzim i ri do të përballet me goditje shkatërruese dhe të paimagjinueshme ndaj objektivave të armikut në rajon. IRGC shton gjithashtu se nuk do të lejojë riorganizimin e strategjive kundërshtare dhe se fushëbeteja mbetet e hapur.
“Jemi të vendosur të vazhdojmë luftën kundër armiqve dhe jemi të gatshëm të përballemi me vendosmëri, përfundimisht dhe menjëherë me çdo kërcënim ose përsëritje të agresionit armik. Në një raund të ri përleshjesh të mundshme ushtarake, ne do t’u shkaktojmë goditje shkatërruese dhe të paimagjinueshme burimeve të mbetura të armikut në rajon. Fusha jonë e betejës është ende e hapur dhe gati për të goditur pikat jetësore dhe simbolet e parandalimit të armikut. Ne nuk do ta lejojmë armikun të riorganizojë strategjinë e tij, për asnjë arsye komoditeti.”
