Rregull i ri në aeroportet e UK: fëmijët 8–9 vjeç mund të përdorin eGates nga 8 korriku 2026

Nga 8 korriku 2026 në aeroportet e Mbretërisë së Bashkuar hyn në fuqi një ndryshim i ri në rregullat e kontrollit të pasaportave, i cili synon të përshpejtojë kalimin e familjeve gjatë udhëtimeve. Sipas këtij ndryshimi, fëmijët e moshës 8 dhe 9 vjeç do të lejohen të përdorin eGates, që janë portat automatike të kontrollit kufitar ku pasaporta skanohet dhe identiteti verifikohet me njohje fytyre, duke shmangur radhët tradicionale te zyrtarët e kufirit. Për të përfituar nga ky lehtësim, fëmijët duhet të jenë të paktën 120 cm të gjatë dhe të udhëtojnë të shoqëruar nga një i rritur. Ky ndryshim ul moshën minimale nga 10 vjeç që ishte më parë dhe pritet të lehtësojë ndjeshëm fluksin në aeroporte, sidomos gjatë sezonit të verës kur numri i udhëtarëve rritet. Autoritetet britanike thonë se masa është marrë për të reduktuar kohën e pritjes në kontrollet kufitare, për të përmirësuar përvojën e udhëtimit dhe për të bërë më efikase kalimin në aeroporte, duke ndikuar potencialisht në miliona familje çdo vit që udhëtojnë nga dhe drejt Britanisë së Madhe.