Një ditë para vizitës së diplomatit amerikan, David Hale, në Kosovë, kryeministri i Kosovës, Ramush Haradinaj, ka paralajmëruar se problemet e Kosovës me Serbinë do të zgjidhen shumë shpejtë.

Këtë paralajmërim kreu i Qeverisë e ka bërë derisa ka marrë pjesë në shënimin e dhjetë vjetorit të Partisë së Re Demokratike të komunitetit boshnjak.

Ai thotë se me zgjidhjen e  ngërçit shumë vjeçar, Kosova do të arrijë qëllimet e veta që të anëtarësohet në Organizatën e Kombeve të Bashkuara.

“Unë besoj se vështirësitë që kemi në raport me Serbinë, shumë shpejt do të zgjidhen dhe do të kemi të gjithë një jetë më të mirë në regjion, dhe Kosova do të arrijë qëllimet e veta, që të anëtarësohet së shpejti në OKB, që do të mundësonte një jetë më të mirë dhe zhvillim ekonomik”, ka thënë Haradinaj

Ndërsa sa i përket taksës së vendosur ndaj produkteve të Bosnjës e Hercegovinës, kreu i ekzekutivit ka thënë se një vendim i tillë nuk është kundër popullit boshnjak.

“Vendimi Qeverisë sonë nuk është i drejtuar kundër popullit boshnjak, pasi që e dini si i kemi raportet me boshnjakët e Prizrenit, por edhe më të gjithë boshnjakët që jetojnë në Ballkan”, ka shtuar Haradinaj.

Haradinaj duke përgëzuar për këtë përvjetor ka shprehur gatishmërinë për të vazhduar bashkëpunimin në krijimin e kushteve më të mira të jetës për të gjithë në Kosovë.

Thirrjet për heqjen e taksës kanë ardhur sot edhe nga numri tre i Departamentit Amerikan të Shtetit, David Hale, i cili ka zhvilluar takime me krerët e shtetit serb.

Hale nesër do të qëndrojë në Kosovë, ku do të takojë krerët e shtetit. Taksa dhe vazhdimi i dialogut pritet të jenë temat e nxehta që do të diskutohen.