PD ka akuzuar këtë të dielë përmes sekretarit për çështjet ligjore Çlirim Gjata prokurorinë e vendit, pasi sipas selisë blu ajo ka penguar qëllimisht hetimin e plotë të dosjes “Babale”.
Gjata tha në një deklaratë për median se prokuroria ka mbrojtur qeverinë dhe orvatjen e saj për të fshehur faktin se Geron Xhafaj, vëllai I ish ministrit të Brendshëm vijonte ende të merrej me trafikun e drogës.
Gjata: PD ka publikuar përgjime zyrtare se si shteti është vendosur në shërbim dhe komandohet nga një ish trafikant i dënuar Alfred Alizoti vetëm se mori përsipër dëshminë e rreme, se si në përgjimin e famshëm Babalja kishte qenë ky dhe jo vëllai i ish-ministrit Xhafaj dhe kjo ishte bërë me urdhër të Edi Ramës. Përgjimet faktojnë përdorimin si seksion i Rilindjes të Prokurorisë së Krimeve të Rënda dhe Prokurorisë së Tiranë, 4 prokurorë u përdorën politikisht për të shpëtuar nga përgjimet Geron Xhafën. Duhet të marreshin të pandehur Taulant Balla, Fatmir Xhafaj, Ardi Velia dhe Albert Nushi dhe një sërë strukturash policore që kanë shërbyer për të manipuluar këtë ngjarje që të shpëtonte pushteti i Ramës.
Përgjimet e Prokurorisë faktojnë se pushteti e sajoi dëshmitarin e remë duke e paguar atë. Prokuroria nuk ka zbardhur disa përgjime me qëllim kur flet për Ballën dhe Drejtorin e Përgjithshme të Policisë së Shtetit që tregon se pushtetin real e kanë kriminelët, se drejtori i policisë vihet në shërbim të tyre edhe në mes të natës. Narkotrafikantët flasin me politikanët më të lartë të rilindjes. Përgjimet faktojnë degradimin e Prokurorisë. Bllokimi i transmetimit të provave dhe fakteve skandaloze që implikojnë zyrtarë të policisë janë prova e Ramës për të vazhduar bashkëqeverisjen me krimin i faktuar edhe nga Zëri i Amerikës. Kemi shumë biseda që nuk po zbardhen nga Prokuroria me numrin e Taulant Ballës dhe Alizotit. Këta dy numra kanë biseduar me njëri-tjetrin. Krimet e Rënda janë vënë në shërbim të sekteve kriminale”.
