Shtetet e Bashkuara e kanë urdhëruar Kinën që ta mbyllë konsullatën në Houston të Teksasit brenda 72 orësh. Pekini e ka cilësuar këtë si provokim politik.
Departamenti i Shtetit tha se vendimi është marrë me qëllim të mbrojtjes së pronës intelektuale amerikane, shkruan “BBC”.
Megjithatë, zëdhënësi i Ministrisë së Punëve të Jashtme të Kinës, Wang Wenbin, tha se vendimi është mizor dhe i pajustifikuar.
Tensionet mes Shteteve të Bashkuara dhe Kinës kanë qenë të larta kohëve të fundit. Administrata e presidentit Trump është përplasur vazhdimisht me Pekinin për tregtinë dhe koronavirusin si dhe për ligjin e ri të sigurisë që Kina e ka miratuar për Hong Kongun.
Të martën, Departamenti i Drejtësisë i ShBA-së e akuzoi Kinën se ka sponsorizuar hakerë që i kanë vënë në shënjestër laboratoret që janë duke zhvilluar vaksina kundër koronavirusit dhe ka ngritur akuza kundër dy shtetasve kinezë.
Kina i ka bërë thirrje ShBA-së që t’i rishikojë këto vendime, duke e paralajmëruar se do të reagojë me kundërmasa të ashpra, nëse nuk ndryshon pozicioni i Shteteve të Bashkuara.
