Në stacionet e testimit të autostradave gjermane, përqindje më e madhe e të infektuarve me Covid-19, është hasur në hapësirën për pushim në autostradën A3, e cila kryesisht sjell udhëtarë nga Ballkani Perëndimor.
Sipas mediave gjermane, pozitivë janë rreth 2,4 për qind e testeve në Qendrën për testim në autostradën A3 Donautal-Ost. Nga hapja e Qendrës për testim, 16.556 udhëtarë lejuan t’u merren strishot. Prej tyre 410 janë pozitivë.
Në pjesën për pushim në Hohfeln, në autostradën A8, përqindja e personave të infektuar është më e vogël (1,2 për qind), ndërsa ende më pak ka në Intal-Ost, në autostradën A93 (0,4 për qind).
Në autostradën A8 janë testuar 11.509 persona, ndërsa 137 kanë rezultuar të infektuar, ndërsa në A93 prej 7.285 testimeve për praninë e koronavirusit, 32 kanë rezultuar pozitivë.
Gazeta “Süddeutsche Zeitung” e ka cituar deklaratën e ministres së Shëndetësisë të Bavarisë, Melani Huml, sipas së cilës dallimi i madh në përqindjen e personave të infektuar sqarohet me faktin se test stacionin në autostradën A3 “në masë të madhe e shfrytëzojnë udhëtarët e Ballkanit Perëndimor”.
Gazeta gjermane përkujton se për një numër të madh të vendeve nga ky rajon, si për Serbinë dhe Bosnje e Hercegovinën vlejnë paralajmërimet e Ministrisë gjermane për Punë të Jashtme deri te qytetarët që të mos udhëtojnë në këto vende për shkak të rrezikut të rritur nga infeksioni.
Ditëve të fundit, numri i të sapoinfektuarve sërish u rrit në Gjermani.
Në raportin e gazetës paralajmërohen kontrolle të përforcuara për mbajtje të obligueshme të maskave mbrojtëse dhe distancës fizike prej 1,5 metra në Bavari, si dhe prania e rritur e policisë në shëtitore, vende për notim dhe parqe publike.
