Izraeli dhe Emiratet e Bashkuara Arabe kanë arritur marrëveshje historike të enjten, që do të çojë në normalizim të plotë të marrëdhënieve diplomatike mes dy vendeve, në një marrëveshje në të cilën ndërmjetës ishte edhe presidenti amerikan Donald Trump.
Nën këtë marrëveshje, Izraeli është pajtuar të suspendojë sovranitetin e disa prej zonave në Bregun Perëndimor, kanë thënë zyrtarë të Shtëpisë së Bardhë për Reutersin.
Marrëveshja e paqes është produkt i diskutimeve të gjata mes Izraelit, Emirateve Arabe dhe SHBA-së.
Marrëveshja u zyrtarizua në një bisedë telefonike që të enjten kanë zhvilluar Trumpi, kryeministri izraelit, Benjamin Netanyahu dhe princi i Abu Dhabit, Mohammed Bin Zayed.
Zyrtarët e kanë përshkruar marrëveshjen si të parën e këtij lloji që kur Izraeli dhe Jordani arritën traktatin e paqes më 1994. Po ashtu kjo konsiderohet si pikë suksesi për politikën e jashtme të Trumpit, i cili synon mandatin e ri në zgjedhjet e 3 nëntorit.
Përmes një komunikate të përbashkëte për media, tre liderët kanë thënë se “janë pajtuar për normalizim të plotë të marrëdhënieve mes Izraelit dhe Emirateve të Bashkuara Arabe”.
“Marrëveshja historike diplomatike do të sjellë paqe në rajoni e Lindjes së Mesme dhe është dëshmi për diplomacinë dhe vizionin e guximshëm të tre liderëve dhe guximin e Emirateve të Bashkuara Arabe dhe Izraelit për të nisur një rrugë të re drejt zbulimit të potencialit të madh në këtë rajon”, thuhet në njoftim.
Delegacionet nga Izraeli dhe Emiratet e Bashkuara Arabe do të takohen në javët e ardhshme për të nënshkruar marrëveshjet bilaterale për investime, turizëm, fluturime direkte, siguri, telekomunikacion e çështje të tjera.
Dy shtetet së shpejti pritet të hapin edhe ambasadat.
