Policia greke u detyrua të shtunën të lëshojë gaz lotsjellës ndaj një turme emigrantësh që prej ditësh janë pa strehë dhe kundërshtojnë ndërtimin e kampit të ri në ishullin Lesbos.
Më shumë se 12 mijë persona, shumica nga Afrika dhe Afganistani, janë banorë të kampit të Morias që dyshohet se u dogj qëllimisht nga disa prej tyre për shkak të kushteve të këqija.
Në fundjavë, banorët u ngritën në protestë në mesin e të nxehtit duke brohoritur “Liri” dhe “Jo kampe” teksa buldozerët e shtetit grek pastronin tokën për të ngritur çadra të reja provizore.
Sikundër një ditë më parë, përpjekjet e demonstruesve për të kaluar rrugën që çon drejt kryeqendrës së banuar të ishullit Lesbos u zmbrapsën nga forcat speciale të rendit.
Javën e kaluar dhjetëra emigrantë rezultuan edhe bartës të koronavirusit të ri.
“Nuk na pëlqen Moria, nuk na pëlqen Greqia. Njerëzit kanë dy ditë pa bukë.”
“Ndjej dhembje përbrenda sepse kam edhe fëmijë. Kemi katër pesë ditë jashtë, pa ndihmë, pa ushqime, pa ujë, asgjë, dhe po flemë në shesh. Kjo na dhemb.”
“Është problem vërtet i madh. Duam të ikim në Gjermani, Francë, Itali. Në Moria nuk kemi koronavirus, është thjesht politike. Moria nuk ka korona.”
Disa nga parullat që protestuesit mbanin në protestën e së shtunës apelonin për ndihmë kancelaren gjermane, Angela Merkel, dhe e përshkruanin kampin e tyre të mëparshëm si ferr.
Dhjetë shtete të Bashkimit Europian kanë marrë përsipër strehimin e banorëve minorenë.
Ndërkohë autoritetet greke kanë refuzuar transferimin në masë të banorëve jashtë ishullit, disa kilometra larg bregdetit turk, pavarësisht zemërimit të qytetarëve grekë kundër emigrantëve.
Një nga sindikatat e mjekëve grekë, ndërkaq, e ka përkufizuar si bombë shëndetësore jetesën në rrugë të refugjatëve, të cilët në shumicën e tyre nuk kanë siguruar as ujë për të larë duart.
Nevoja për të vënë situatën nën kontroll është bërë më urgjente nga fakti që autoritetet kanë humbur gjurmët e 35 banorëve të kampit që dolën pozitivë me Covid-19.
Autoritetet shëndetësore kanë premtuar teste të shpejta në hyrje të kampit të ri, dhe dhoma karantinimi të gatshme për këdo banor që do të rezultojë i infektuar rishtas.