Ndërsa debati politik po zien për hapjen e listave dhe koalicioneve, ish-presidenti dhe politikani Bamir Topi thotë se partitë politike po bine në lojën e kryeministrit Rama.
Topi: Të diskutohet vetëm për lista të hapura, edhe pse unë jam për lista të hapura, do të thotë të trregohesh shumë i ngushtë. Po bëhet një lojë e pabarabartë. Jo vetëm realisht por edhe politikisht duket sikur Edi Rama po i tërheq të gjithë rreth diskutimeve të tij, tenton ti mbajë në lojën e tij.
I ftuar në “Ditë e Re” në Rtv Ora, Topi shmang komentin mbi të qënit gati apo jo të PD-së për të garantuar një rrotacion pushteti në zgjedhjet e 25 qershorit.
Topi: Nuk e përcaktoj unë janë gati nuk janë gati, e përcaktojnë rregullat e lojës dhe ndjesia e njerëzve. Por nuk ka rregulla loje dhe ndjesia e njerëzve është mëse e çuditshme që ka të bëjë me nivelin e kulturës demokratike të popullit tonë.Niveli i kulturës demokratike i popullit tonë është i mjerueshëm. E shoh tek të ashtuquajturit intelektualë, janë të përdorshëm, përdoru këtu, përdoru atje.
Nivelin e ulët të kulturës demokratike dhe përqëndrimin e pushtetit në pak duar e sheh edhe si arsye të “vrasjes së shpirtit të protestës”.
Topi: Si mund të reagosh sot kur të gjithë jetojnë në syrin e Big Brother? Është një vend i vogël ku akumulimi i pushtetit është në pak duar dhe totalisht e kontrollueshme. Ky vend ka probleme të mëdha me kulturën demokratike dhe drejtësinë.Partitë politike janë kazerma politike.
Një urim ditëlindje i kryeministrit Edi Rama pak ditë më parë për ish-liderin historik të PS-së Fatos Nano u shoqërua jo me pak reagime.
Vetë Bamir Topi e sheh këtë si nevojë të Ramës, pasi siç thotë ai, Nano edhe pse ka ikur nga politika ka lënë njerëzit e tij pas.
Topi: Dihet se pse e ka bërë, ndoshta i duhet. Nano nuk është pa kontigjentët e tij në politikë. Ka qenë një figurë e rëndësishme e politikës shqiptare. Njerëzit me kalimin e kohës bëhen edhe nostalgjikë, kanë pakënaqësi për atë që është sot se nuk i ka trajtuar siç i ka trajtuar ai tjetri. Nano me sa e njoh unë si natyrë është njeri liberal, i papërkushtuar për të bërë keq. Ndonëse i ka takuar një kampi tjetër, kam ditur ta vlerësoj si politikan, qytetar dhe njeri liberal.
E ndërsa ndau këto konsiderata për Fatos Nanon, Bamir Topin kur e pyet se cilin politikan do të veçonte si më të mirin, por parë me sytë e qytetarit, e ka të pamundur të japë një emër.
Topi: Do më duhet të mendohem disa orë për të gjetur një që relativisht dallon mbi të tjerët. Janë pjesë e një mjedisi që pak a shumë kanë infektuar njëri-tjetrin.Nuk më intereson sa kohë rri në pushtet ti apo tjetri. Problemi është çfarë produkti po i jep këtij vendi. Por këtu nuk është se nuk ka njerëz por këta njerëz që do ti duheshin politikës sot janë më inteligjentët dhe nuk përfshihen sepse përpjekja mund të jetë shumë e madhe dhe zhgënjimi shumë i madh.
Por veç halleve politike që këtij vendi nuk i kanë munguar kurrë për hir të së vërtetës, shqetësimi madhor i momentit mbetet shëndeti, dalja me sa më pak pasoja nga pandemia e koronavirusit.
Topi: OBSH është në një krizë sepse janë në influencën e shumë informacioneve, mesa duket edhe influenca politike.Virusi nga pranvera deri tani ka një ndryshim, ka një mutacion. Nuk e dimë nëse përfundon këtu. Është shumë e panjohur situata që do të vijë në dimër.
