Gjashtë shtetas britanikë u paraqitën këtë të premte para gjykatës “Old Bailey” në Londër, pasi akuzohen si të përfshirë në një sulm me zjarrvënie në mars në magazinat industriale në pronësi të Ukrainës, në emër të grupit paraushtarak rus Ëagner.
Pesë prej tyre, Dylan Earl, Jake Reeves, Nii Mensah, Paul Inglis dhe Jakeem Rose akuzohen për “zjarrvënie të rëndë në bazë të një Akti të Sigurisë Kombëtare të vitit 2023”.
Dylan Earle akuzohet se ka komunikuar me një anëtar të grupit Wagner dhe ka rekrutuar dhe paguar vrasës për të vënë zjarrin. Ndërkohë, Personi i gjashtë, Dimitrios Pavlauskas (22 vjeç), akuzohet për “fshehje informacioni për akte terroriste”, ndërsa u deklarua i pafajshëm në Old Bailey.
Një tjetër anëtar i grupit, i quajtur Ugnius Asmena (19 vjeç), i cili gjithashtu akuzohet për zjarrvënie të rëndë, nuk mori pjesë në seancë.
Rreth 60 zjarrfikës u thirrën për të shuar flakët që shpërthyen në magazinat industriale në Leyton, në lindje të Londrës. Sipas aktakuzës, të pandehurit dyshohet se kanë shënjestruar këto vende në pronësi të një ukrainasi në emër të grupit Wagner, i cili konsiderohet organizatë terroriste në Britani.
Kjo çështje ka tronditur klasën politike të Britanisë që ka bërë thirrje për një “fund të menjëhershëm” të aktiviteteve keqdashëse të orkestruara nga Rusia në tokën e saj.
Një seancë tjetër është caktuar për këtë çështje më 25 tetor, ndërsa vendimi final pritet të jepet në qershor të 2025.
