Vizita e Princit Harry në Mbretërinë e Bashkuar është shoqëruar me një përplasje të re me familjen mbretërore, pasi oferta që ai të qëndronte në një rezidencë mbretërore u tërhoq në momentin e fundit.
Sipas burimeve të cituara nga mediat britanike, Mbreti Charles III thuhet se ka humbur durimin pas një serie ndryshimesh vendimi nga ana e Harry-t lidhur me akomodimin në Pallatin Buckingham. Burime pranë Pallatit pretendojnë se Harry fillimisht nuk e pranoi ofertën brenda afatit të kërkuar dhe më pas kërkoi të qëndronte aty, por organizimet për stafin dhe sigurinë nuk mund të bëheshin më në kohë.
Sipas këtyre burimeve, Mbreti nuk dëshiron të “vihet nën presion” dhe nuk pranon një situatë të vazhdueshme pasigurie rreth marrëdhënieve me djalin e tij.
Nga ana tjetër, përfaqësuesit e Princit Harry kanë dhënë një version tjetër të ngjarjeve. Ata kanë thënë se Harry nuk e refuzoi thjesht ofertën, por po përpiqej të zgjidhte çështjet e sigurisë pas vendimit për të mos iu dhënë mbrojtje e financuar nga shteti. Sipas tyre, ai e pranoi ofertën sapo u zgjidhën këto çështje, por më pas ajo u tërhoq.
Harry ndodhet në Britani për angazhime bamirësie dhe aktivitete që lidhen me Invictus Games. Ai po udhëton pa bashkëshorten e tij Meghan dhe fëmijët e tyre.
Përplasja e fundit shihet si një tjetër shenjë e marrëdhënieve ende të tensionuara mes Harry-t dhe familjes mbretërore, pavarësisht zërave për një afrim të mundshëm mes tij dhe babait të tij.
